Nongpoh, Naitung 21:
Ka lympung ïalehkai chess ba la tip kum ka 46th Meghalaya Chess Championship ba la pynïaid da ka Ri Bhoi District Chess Association (RBDCA) hapoh ka jingkhmih jong ka Meghalaya Chess Association (MCA) ka la sdang ha ka Sngi Thohdieng kaba la plie da u Dr Celestine Lyngdoh, MLA jong ka Umsning konstitwensi.
Ïa kane ka lympung ba ar sngi lynter la pynlong ha Umsning ha kaba la wan ïashim bynta da ki nongïalehkai na ki 6 tylli ki district jong ka jylla. Ki nongjop ha kane ka lympung kin ïoh ïa ka lad ban mihkhmat ïa ka Jylla ha ki lympung ïalehkai jong ka kyrdan National Level pyrshah ïa ki nongïalehkai na kylleng jong ka ri India.
Ha kane ka sngi la ïadon lang u President ka MCA, u Bah K.M Warjri, u Bah Frankie Nongrum, President ka RBDCA, u Bah Rocky Kylla, Chairman ka Umsning Town Durbar, Bah Rocky A. Marweiñ, uwei na ki ’riew pawkhmat ka thaiñ Umsning lem bad kiwei kiwei ki ’riew rangbah.
Haba ai jingkren ha kane ka sngi, u Dr. Celestine u la ong ba wat lada ïalade um nang satia ban ïalehkai chess, hynrei u ïohi ba kane ka jaid jingïalehkai ka dei kaba pynproh jabieng naba ki nongïalehkai ki hap ban pyrkhat sani bha hashwa ba kin shim ïa ka sienjam ban ïaid shakhmat ha ka jingïakhun. U la ai nuksa ruh ba ka jingmih jong ka jingïashoh ïadat ka dei namar ba ki briew kim ju pyrkhat hashwa ba ki leh eiei bad haba peit pat ïa ki nongïalehkai Chess, la ïohi ba ki long kiba jai jai bad kiba pyrkhat bha hashwa ba kin shim ïa ka sienjam ban ïaid shakhmat.
Ha kajuh ka por, u Dr Celestine u la ai ruh ka jingkitbok kitrwiang sha ka MCA bad ruh ïa ka RBDCA kiba la lah ban pynlong ïa kane ka lympung ba kin dang lah shuh shuh ban leh khambha ha ki lympung ki ban sa pynlong lada ki lap ba ka don kano kano ka jingduna bad khamtam eh u la kyntu ruh ïa ki nongïalehkai ba kin sei ïa la ki sap ki phong ban shut pynnep bha ïa la ka jabieng khnang ba kin ïoh ka jingjop bad kiew shaphrang ha ka jingim ka jongki.
Na ka liang u President jong ka RBDCA, u Bah Frankie Nongrum u la pynpaw ïa ka jingsngewnguh sha ka MCA kaba la ailad ïa ka RBDCA ban pynlong ïa kane ka lympung hapoh Ri Bhoi District. U la pynpaw ruh ïa ka jingkmen ba na ka liang ka Directorate of School Education & Literacy (DSEL) jong ka jylla ka la pynmih ïa ka hukum ban bthah ïa baroh ki skul ha ka Jylla ba kynthup naduh ki Upper Primary haduh ka kyrdan Higher Secondary ba ki dei ban plie noh ïa ka Chess Club ha ki skul ki jong ki khnang ba ki khynnah pule kin ïoh ïa ka jinghikai Chess naduh ka por ki dang khynnah ka rta kum shi bynta ban kyntiew ïa kane ka jaid jingïalehkai hapoh ka jylla.
Shuh shuh u Bah Frankie Nongrum u la ong ruh ba kane ka jaid jingïalehkai Chess ka dei kaba wat ki skul kiba duk ruh ki lah ban kyrshan naba ki tiar ki tiar jong kane ka jaid jingïalehkai ki dei kiba tad dor haba ïanujor bad kiwei pat ki jaid jingïalehkai.
