Shillong, Naitung 23:
Ka NECDC kaba dei ka kynhun kaba peit bad khmih jong ki hynriew tylli ki jylla ba kynthup ruh ïa ka NE Zone jong ka BCCI ka la pynlong ïa ka 08th Conclave & 2nd Achievers Award jong ka, ha ka 21 tarik mynta u bnai ha Aijal Club, ïa kaba la pynlong da ka Cricket Association of Mizoram.
Ha kane ka jingïalang la ïoh ban ïakren bad ïatai sani bha halor kumno ban nang pynkhlaiñ shuh shuh ïa ka jingïatreilang ha kaba ïadei bad ka jingïalehkai kriket bad kiwei pat ki kam kiba don jingïadei hapdeng kine ki hynriew tylli ki jylla, ïa kaba la lamkhmat da u Naba Bhattacharjee uba dei u President jong ka MCA bad u nongseng bad Co-Convener jong ka council.
U Naba u la ban jur halor ka jingdonkam ban don ka jingïatreilang kum kawei ka kynhun jong ki hynriew tylli ki jylla, ban ïatreilang sha ka thong kaba dei ka juh ïa baroh.
Ha kane ka sngi na Meghalaya la mihkhmat da u Bah Rayonald Kharkamni, uba dei u Vice President bad dkhot ba nyngkong bad ruh u Dhrubajyoti Thakuria uba dei u Treasurer ka MCA.
Ha kane ka sngi sam khusnam la wan ban ïadon lang da ki nongïalehkai kriket na ki hynriew tylli ki jylla kynthup ka jingsam khusnam sha kito ki nongïalehkai ba la lah ban ïalehkai bha ha ka BCCI Domestic Season 2022-2023. Ha kane ka sngi u PU Zoramthanga, Myntri Rangbah ka Mizoram u la ïadon lang kum u kongsan lem bad kiwei kiwei ki kynrem ki lyndan.
Ka Meghalaya Cricket Association ka la ïoh pdiang ïa ka khusnam na ka bynta ka jingshah kyntiew kyrdan sha ka Elite group ha ka Senior Category ha ka aiom 2021-2022 jong ka lympung BCCI domestic season, nalor ka jingai khusnam sha ki nongïalehkai kiba la khur bun ki wiket, kamai bun run bad ruh kito kiba la lah ban ïada ïa la ka jong ka wiket.
Ki nongïalehkai ka Meghalaya kiba la khur khusnam ki long ka Ajima Sangma, kaba dei ka nongkawang bol kaba la khur haduh 17 wiket ha ka Senior Women’, u Mrinal Das uba la tied haduh 346 run ha ka U-19 Men, u Manish Sharma uba la khur 25 wiket ha ka U-23 Men, ka Shreya Marak kaba la khur 8 wiket ha ka U-15 Girls bad u R Ryngkhlem uba la lah ban kem saw tylli ki bol bad 2 tylli ki stumping ha ka U-16 Boy.
