Shillong, Naitung 24:
Ïa ka lympung ïalehkai 46th Meghalaya Chess Championship ba la pynïaid da ka Ri Bhoi District Chess Association (RBDCA) hapoh ka jingkhmih jong ka Meghalaya Chess Association (MCA), ka la poi sha kaba kut ha ka 22 tarik mynta u bnai ha Umsning, Ri Bhoi District.
Ïa ka nam lahduh ha kane ka lympung la rah da u ’rangïalehkai na East Khasi Hills u Amit Saraf, ka kyrdan ba-ar ka leit sha u Silkam, balai u Barbit Sangma bad basaw da u Bensing G. Momin. Kine baroh lai ngut ki dei na Garo Hills District.
Kine saw ngut ki ’rangïalehkai kin mihkhmat ïa ka Jylla sha ka National Chess Championship ka ban long ha Pune naduh 15 haduh 25 tarik u Nailar mynta u snem.
U Advitiya AG na East Khasi Hills u la ïohpdiang ïa ka nam Best Boy’s, katba ha ka liang ki kynthei la ïoh da ka Sara Safi Lyngdoh na West Khasi Hills (Best Female). Ïa ka Best Veteran la khur da u Ganesh Rai na East Khasi Hills, Best Ribhoi Player ka leit sha u Bah L. Syiemlieh, katba ïa ka nam Best Girls Player ka leit sha ka Amezia Sangma na Garo Hills.
Na ka liang u kongsan, u Pastor Jamir na ka Rehap Center u la ai jingkren bad kyntu ïa ki samla ban lait na ki jingsniew ba kyrni ha ka imlang sahlang. La ïadon ryngkat ruh ki nongkitkam na baroh ki district kata u Bah I.M Warjri, President bad kiwei kiwei.
