Shillong, Naitung 25:
Ka jingïalehkai hapdeng ka Paris Saint-Germain bad ka Al Nassr kaba long ka klob ba mih khmat da u Cristiano Ronaldo ha Japan ka la pynlong ban ïakhaid mar 1-1 kol ha ka sngi Ba-ar ha Osaka.
Ha u snem ba la dep, ki paidbah ’riew ïeit phutbol na Japan ki la thrang ban pyndap smam ïa ka stadium khnang ban ïohi da la ki jong ki khmat ïa u Lionel Messi, Kylian Mbappe bad u Neymar ha ki jingïalehkai paralok na ka bynta ka PSG. Hynrei mynta ka kynti ka la duna bha ha ka jingdon ki nongpeitkai ha katei ka stadium.
U Messi u la mih noh na ka PSG ban pynïasoh sha ka klob jong ka Major League Soccer ka Inter Miami, katba u Neymar u dang don hapdeng ka jingmynsaw ka khohsiew naduh u Rymphang bad dangshen u la wanphai sha ka jingkilanmet.
Kumba ka long mynta ka jingïadei hapdeng u Mbappe bad ka PSG ka la nang jngai bad blad namar u khlem shah kynthup hapoh ka kynhun ha shwa ba ka
PSG kan leit sha Asia. Kane ka rai ka la mih ka jingartatien halor ka lawei ka jong u bad kane ka klob bad kiba bun na ki paidbah nongkyrshan ki la sngewphylla shaphang jong u.
Ha katei ka jingïakhun, u Carlos Soler u la pyrshang ïa ka jingangnud ban ïoh pynkhih jar lyngba ka free-kick ha katei ka jingïakhun ha Osaka, hynrei u rangapkol ka Al Nassr u Nawaf Alaqidi u la lah ban ïashan tyngeh bad kyrda na ka jingshah thep.
Kumjuh u Noha Lemina u la ïoh ïa ka kabu kaba biang bha na ka bynta ka PSG ha ka minit kaba 20, hynrei um shym la lah ban pynurlong.
Kumba ka paw ki la don kumba 25,432 ngut ki paidbah ha ka kylla step ban sakhi ïa ka rukom ïalehkai u Ronaldo.
Ha kaba nyngkong utei u khlur ïalehkai ka Portugal u la ïoh ban shut najngai, hynrei u rangapkol ka PSG u Gianluigi Donnarumma u la lah ban kyrda na ka jingshah thep. Ha kaba kut kine ki kynhun kim shym la lah ban thep bad ki la kut ha ka jingïakhaid.
Ka PSG kan pynkhreh ïa kawei pat ka jingïakhun pyrshah ïa ka Cerezo Osaka ha ka sngi Thohdieng ha shwa ban kan leit sha Tokyo ban ïakhun pyrshah ïa ka Inter Milan. Katba ka Al Nassr kan ïakynduh pyrshah ïa ka Inter ha Osaka ha ka sngi Palei.
