Shillong, Naitung 26:
Ka lympung ïalehkai State Level Subroto Mukherjee Football Tournament ba pynïaid da ka tnat ïalehkai ka Sorkar Jylla ka la jam sha ka semi final ha kane ka nongbah.
Ha kane ka kynti kaba mynta ki ar tylli ki kynhun na Garo Hills ki la lah ban pynpaw ïa ka jingtbit na ka bynta jam sha ka semi final bad kane ka pyni ba ki la nangkiew shaphrang. Kine ki kynthup ïa ka Mangsang Mari Apal U.P School na East Garo Hills ha ka U-14 bad ka Okkapara Secondary School na South West Garo Hills ha ka Under-17 ki shynrang. Lah ban ong ba kane ka dei ka sien kaba nyngkong ïa kitei ki kynhun na Garo Hills ban jam shaduh kane ka kyrdan.
Haba phai sha ki jingïakhun jong ka Under-14 kiba la long ha ka sngi Balang ha SAI Training Centre, ka H. K Sing SS (West Jaiñtia Hills) ka la jop haduh 11-1 kol ïa ka St. John Sec School (West Garo Hills) bad u Budmiha-oo Mukhim (8,16,37,47 & 65+) u la thep marwei haduh san kol.
Ka Myngken HSS (Ri Bhoi) ka la jop haduh 16-1 kol ïa ka Mawbidong SS (South West Khasi Hills). U Chanjib Chettri (10,12,17,21,28,34,50,52 & 54) u la khur haduh lai tylli ki hat-trick.
Ka Dabit Ampangdam S.S.A (South Garo Hills) ka la ïakhaid mar 1-1 kol pyrshah ïa ka St. Peter HSS (West Khasi Hills). Kumjuh ka K. B Memorial SS (East Jaiñtia Hills) ka la ïakhaid mar 1-1 kol pyrshah ïa ka Little Star English Medium SS (Eastern West Khasi Hills).
Ha ka Under-17 jong ki shynrang kaba la long ha madan Third Ground Polo, ka Rymbai Presbyterian HSS (East Jaiñtia Hills) ka la jop da 2-1 kol ïa ka Nilwagre SS (South Garo Hills).
Ka Myngken Christian HSS (Ri Bhoi) ka la pynliem noh ïa ka Rangthong Christian HSS (South West Khasi Hills) haduh 5-0 kol bad u Alicestar Thangkhiew (29,30 & 40) u la khur ïa ka hat-trick.
Ka Assam Rifles Public School (East Khasi Hills) ka la jop da 2-1 kol ïa ka Dobasipara SS (West Garo Hills). Ka Sibsing Govt Memorial HSS (West Khasi Hills) ka la jop da 2-0 kol ïa ka Rongrengiri Govt HSS (East Garo Hills).
Haba phai sha ka Under-17 ki kynthei kaba la long ha madan Heh Mawlai, ka Ïewrynghep SS (East Khasi Hills) ka la jop da 2-1 kol ïa ka Rangthong Christian HSS (South West Khasi Hills). Ka North Liberty HSS (West Jaiñtia Hills) ka la pynjem khnap ïa ka Birin Nuchong SS (South West Garo Hills) haduh 7-0 kol bad ka Daphimon Khyriem (11,34 & 39) ka la khur ïa ka hat-trick.
Ka Chachat U.P.S Rongjeng (East Garo Hills) ka la shah rem noh ha ka Sibsingh Memorial Govt HSS (West Khasi Hills) da 3-0 kol. Ka Khliehriat HSS (East Jaiñtia Hills) ka la ïakhaid mar 3-3 kol pyrshah ïa ka Saiden SS (Ri Bhoi).
