Shillong, Naitung 26:
Ka kynhun ki ’rang bad ki ’thei ïalehkai phutbol ka ri ka la ïoh ïa ka lad ban ïashim bynta ha ka Asian Games kaba dei ruh ka sien kaba nyngkong ha ki khyndai snem. Kane ka wan urlong hadien ba ka tnat ïalehkai jong ka Sorkar Pdeng ka la ai jingbit ha ka sngi Balang ban leit ïashim bynta ha katei ka lympung ka ban long ha u Nailur ha Hangzhou, China.
Ka synjuk ïalehkai jong ka All India Football Federation ka la pynpaw ka jingai khublei ïa ka tnat ïalehkai khamtam ïa u Myntri ka tnat ïalehkai u Anurag Thakur lem bad ka Indian Olympic Association (IOA) kiba la shim khia ban plie lad ïa ka kynhun ki ’rang bad ki ’thei ïalehkai ka ri ban leit ïashim bynta ha ka Asian Games.
U President ka AIFF u Kalyan Chaubey u la ong, “Kane ka long ka sngi kaba kham kongsan ha ka jingïalehkai phutbol jong ka ri ba ka la lah ban pynurlong ïa ki jingangnud. Ngi ai khublei ïa ka Sorkar Pdeng bad kumjuh ïa ka tnat ïalehkai kiba la kloi ban ai jingkyrshan bad ban ai jingbit ban leit ïashim bynta ha ka 19th Asian Games.”
“Ka kynhun ïalehkai ka la lah ban jam shaphrang dangshen ha ka jingïoh kyrdan ba 99 ha ka pyrthei bad nga sngew ban ong ba kane kan long ban pynshlur bad ai mynsiem ïa ki nongïalehkai jong ki. Ka long ka burom kaba khraw ban mihkhmat ia ka All India Football Federation bad kumjuh ïa ka ri hi baroh kawei.”
Na ka liang u coach ka kynhun ki rangïalehkai ka ri u Igor Stimac u la ong, “Ka long ka sngi kaba khraw ha ka kam ïalehkai phutbol jong ka ri lyngba ka jingshim khia da u Myntri ka tnat ïalehkai u Anurag Thakur lem bad ka Sorkar India. Ka jingai khublei ïa ki halor ka jingplie lad na ka bynta ban ïakhun pyrshah ïa ki kynhun kiba kynsai ha ka Asian Games.”
Kumba ka paw ka kynhun ki rangïalehkai ka ri ka la lah ban ïalehkai bha ha ka Asian Games ha ki snem ki la leit bad ka la khur ruh ïa ka takma ksiar ha u snem 1951, hadien ka la bteng biang ban wan ha ka kyrdan ba hakhlieh ha u 1962 bad ka la khur ïa ka takma rnong ha u snem 1970. Ha ka Asian Games jong u snem 1951 ka kynhun ka la ïai long ka kynhun kaba paw ha kaba ka la khur ïa ka nam lahduh ha New Delhi.
