Shillong, Naitung 26:
Ka Aston Villa ka la kyntait ïa ka jingtyrwa na ka klob ïalehkai kaba la rung sha ka final ha ka Champions League ka Inter Milan na ka bynta u Emiliano Martinez.
Utei u rangapkol na Argentina u la pynïasoh sha kane ka klob jong ka Premier League na ka Arsenal ha ka jingsiew kaba £17million ha u Nailur jong u 2020 bad u la lah ban pynpaw ïa ka jingtbit ha Villa Park.
Une u rangïalehkai u la long u rangapkol uba tbit ha ka lympung ïalehkai phutbol jong ka pyrthei. Hynrei mynta ka kynti u la long uba kham kongsan na ka bynta ka klob bad ka ri jong u, kaba u la lah ban pynurlong ïa ka Argentina ban khur ïa ka nam lahduh ha ka World Cup 2022.
U Martinez u la don ka jingthmu ban mih noh na Aston Villa naduh u snem ba la dep namar ki klob kum ka Chelsea, Tottenham bad ka Manchester United ki la pyrshang ban ïoh ïa u rangapkol uba thymmai.
Hynrei ka Aston Villa hapoh ka jingïalam u Unai Emery, ka la ïalehkai bha ha ka lympung ïaknieh na ka bynta ka Europa Conference League wat hapdeng ka jingsuki ha ka aïom ïalehkai 2022-23 hapoh ka jingïalam u Steven Gerrard.
Wat hapdeng ka jingpyrshang kitei lai tylli ki klob jong ka Premier League na ka bynta ban ïoh ïa u rangapkol, hynrei ka kynhun ba khlaiñ bor na Italy kan ïaleh ban buh ka jingtyrwa ban soi ïa utei u rangïalehkai uba la 30 snem ka rta.
Kat kum ki khubor la ong ba na ka liang ka Villa ka la kyntait ïa ka jingtyrwa kaba €15million (£12.9m). Te kumta ka Inter kan pyrshang ban buh biang ka jingtyrwa ha ka dor kaba kham heh bad haduh mynta kam pat shym la don kano kano ka jingïamynjur eiei hapdeng kitei ar klob.
Dangshen katei ka klob jong ka Serie A ka la die noh ïa u rangapkol Andre Onana sha ka Manchester United bad ka la pyllait noh ïa u Samir Handanovic. Kumta ka donkam ban soi rangïalehkai na ka bynta ban wanrah bujli ha kane ka aïom ïadei ïathied rangïalehkai.
Ka kontrak jong u Martinez kan kut haduh u snem ban wan namar u la soi ïa ka kontrak kaba san snem shiteng ha ka jingsiew kaba €28m.
Kumba ka paw u Martinez um pat ju ïoh ban ïalehkai ha ka Champions League naduh u Naiwieng jong u 2014, ha kaba ka Arsenal ka la pynliem ïa ka Borussia Dortmund da 2-0 kol ha Emirates.
