Shillong, Naitung 26:
U Ricky John Shabong u la soi ïa ka kontrak bad ka Punjab FC na ka bynta ban ïashim bynta ha ka lympung ïalehkai Indian Super League mynta ka aïom.
Kham ha shwa u Ricky u la don bad ka ATK Mohun Bagan (Mohun Bagan Super Giant) naduh ba u la mih noh na ka Indian Arrows ha ka aïom ïalehkai 2021-22.
Hynrei u la leit ïalehkai (loan) sha ka Rajasthan United, ha kaba u la ïoh ban ïalehkai 17 sien ha ka lympung I-League. U la ïoh ban ïalehkai 12 sien ha ka I-League na ka bynta ka Indian Arrows ha ka aïom ïalehkai 2020-21 bad 16 sien ha ka aïom ïalehkai 2019-20.
Ha ka aïom ba la dep, u la leit phai biang sha ka Bagan bad u la ïoh ban ïalehkai tang shisien ha ka ISL.
Dei ha ka por ba u dang ïalehkai na ka Indian Arrows kaba dei ka kynhun ïalehkai jong ka All India Football Federation ba u Ricky u la ïoh ïa ka lad ban mihkhmat ïa ka kynhun ïalehkai ka ri ha ka U-14 haduh ka U-20.
Te kumta utei u rangïalehkai ba dang 20 snem ka rta un pynkhreh ban ïashim bynta na katei ka klob kaba thymmai ha ka ISL ryngkat bad u Samuel Lyngdoh Kynshi.
