Shillong, Nailar 27
Ka Manchester City bad ka Aston Villa ki la ïoh ban khur jingjop ha ka jingïalehkai jong ka lympung English Premier League (EPL) kiba la long ha ka sngi U Blei.
Haba phai sha ka jingïalehkai, ka Manches -ter City hadien ka jingïakhun kaba tyngeh ka la lah ban pynliem noh ïa ka Sheffield United kaba la long ha madan Bramall Lane, kaba la pynlong ruh ïa ka City ban kiew hajrong duh ka miej ïakheiñ point, ha kaba ka la khur 3 tylli ki jingjop na ki lai tylli ki jingïalehkai.
Ha kane ka jingïakhun, watla ka Manchester City ka la ïoh ban khyrwit ïa ka kol kaba nyngkong lyngba u Erling Haaland ha ka minit kaba 63, hynrei lyngba ka jingïakhun tyngeh, ka Sheffield United ka la ïoh ban pynphai ïa kane ka kol ha ka minit kaba 85 lyngba u Jayden Bogle, uba la kyrmen skhem ruh ba ka kynhun jong u, kan ïoh khur ïa ka shi point na kane ka jingïakhun.
Hynrei ka jingmut jingpyrkhat jong ki rangïalehkai ka Manchester City ka long beit ban khur lai point pura bad dei ha ka minit kaba 88 ba u Rodri u la ïoh ban khyrwit ïa ka kol jong ka jingjop.
Kane kan dei ruh ka jingjop kaba 200 na ka bynta u Pep Guardiola ha ka lympung Premier League kum u manager jong ka City tang na ki 269 tylli ki jingïalehkai bad u ban dei ruh uba sted tam ban kot sha ka 200 tylli ki jingjop ha ka history jong kane ka lympung.
Haba phai pat sha kawei ka jingïalehkai, ki ar tylli ki kol kiba la ïoh ban thep da u Matty Cash ka la pynlong ïa ka Aston Villa ban khur ïa ka jingjop kaba suk ha ka jingïakhun pyrshah ïa ka Burnley.
Kumba ka long mynta, ka Burnley kam pat shym la ïoh ban khur wat tang shi point, hadien ba ka la wan phai biang sha ka lympung Premier League.
Watla ka Aston Villa ka la mad ïa ka jingshah rem kaba heh ha ka sngi sdang ïa kane ka aiom ba thymmai, kata ban shah pynliem da 5-1 kol ha ka Newcastle United, hynrei hadien kane, kim shym la phai dien shuh ïa kaei kaba la jia, hynrei ban khur haduh lai tylli ki jingjop ha baroh ki lympung ïalehkai.
Ha katei ka jingïalehkai, ka Aston Villa ka la pynliem noh ïa ka Burnley da 3-1 kol. Nalor u Cash ïa kawei pat ka kol jong ka Villa la ïoh ban thep da u Moussa Diaby, katba ïa ka shi kol jong ka Burnley pat la ïoh ban thep da u Lyle Foster.
