Shillong, Naitung 21
Ka jingmih ki kynrum kynram halor ka jingkynnoh donkti u coach bad u manager hapoh ka kynhun ïalehkai kriket U-23, ka la pynlong ïa ki kmie ki kpa ban don hapdeng ka jingsngew khuslai na ka bynta la ki jong ki khun ba kin leit sha ki jaka kilanmet na ka bynta kiwei pat ki jingïalehkai.
Haba iakren bad ki kmie ki kpa ki bym kwah ban pynpaw ïa ki kyrteng jong ki, la ong ba ki don hapdeng ka jingsngewtieng ban phah ïa ki jong ki khun sha ki prokram kilanmet. “Kum ki kmie ki kpa ngi don hapdeng ka jingsngew khuslai ban phah ïa la ki jong ki khun sha ki prokram ïalehkai bapher bapher namar ngim don shuh ka jingshaniah lada ngim lah ban leit synran lang ïa la ki jong ki khun khamtam ïa ki khun kynthei sha ki jaka ïalehkai.”
Kane ka kynrum kynram ka la paw halor ka jingkynnoh donkti u coach ka kynhun ki ‘thei ïalehkai kriket U-23, u Hemant Roy bad u Mana-ger u Sanjay Mondol halor ka jingkren kynshleiñ bad jrong kti ïa ki ‘thei ïalehkai lyngba ka jingtohkti dangshen da ka Meghalaya State Commis -sion for Women. Kane ka la paw pyrthei hadien ka jingbym shim khia da ki nongïalam barim ka synjuk ïalehkai jong ka Meghalaya Cricket Association watla ki la dep ban ujor kham hashwa sha katei ka synjuk.
Kumba ka paw ka Jylla ka dangdon hapdeng ka jingpynkhreh na ka bynta ka 39th National Games ka ban long ha u snem 2027, hynrei kumba ka long mynta ka la long ka jingeh kaba khraw na ka bynta ki kmie ki kpa ban phah la jong ki jong ki khun sha ki jaka kilanmet khlem da don ki nongsynran lang naïing nasem.
“Hooid kane ka jingjia ka jia ha ka kynhun ïaleh -kai kriket, hynrei kaei kaba ngi sngewtieng ka long ba ïoh kane ka wan jia sa ha kiwei pat ki jingïalehkai namar kiba bun na ki synjuk ïalehkai ki la wanrah da ki coach kiba nabar jylla ban ai jinghikai ïa ki nongïalehkai kynthei bad shynrang na ka bynta ban pynkhreh ïa ka National Games,” la pynpaw kawei ka long kmie.
