Bhopal, Nailar:
Ka kynhun Myntri jong ka Madhya Pradesh ka la mynjur ban pyntreikam ïa ka Maoist Surrender, Rehabilitation-cum-Relief Policy, 2023 ha ka por ba la don ka jingïalang ba la pynïaid da u Myntri Rangbah u Shivraj Singh Chouhan. Ha ka jingïakren bad ki nongthoh khubor, u Myntri ka Medical Education u Vishwas Sarang u la ong, “Ka kynhun Myntri ka la mynjur ban pyntreikam ïa ka ‘Madhya Pradesh Maoist Surrender, Rehabilitation cum Relief Policy 2023’ halor ka jingthmu ban pynbiang ki kam ki jam bad ki lad ki lynti ban ai jingkyrshan ïa ki lehnoh Maoist kiba la leit ban pyndem ha ki kti jong ka aiñ. Ka bynta kaba kongsan halor ka jingthmu jong kane ka jingpyntreikam ka long ban kynthup ïa kito kiba la leit ban pyndem ïalade bad ban phai sha ka jingim kaba bha ban pynsangeh noh ha ka ban leh ïa ki kam thombor.”
Katkum ka jingtreikam jong kane ka jingpyntreikam, T. 1.50 lak yn sa ai sha kito ki lehnoh Maoist kiba la leit ban pyndem na ka bynta ba kin ïoh shna ïing, bad sa kumba T. 10,000 haduh T. 4.50 lak la buh na ka bynta kito kiba leit pyndem ha ryngkat ki tiar siat, ka jingsiew kaba T. 50,000 na ka bynta ban ïathoh shongkurim, T. 5 lak ka ban pynbna kum ka khusnam, ha kaba ka lah ban tam na kane, na ka bynta ban thied ïa ki jingdon jingem ki bym lah ban pynkhih bad T. 1.50 lak na ka bynta ka jingshah hikai pyntbit na ka bynta ban ïohkam ïohkam.
Shuh shuh la ïathuh ba nalor kane kin sa ïoh jingmyntoi ruh lyngba ka jingtreikam jong ka skhim Ayushman Bharat Yojana bad ka skhim pynbiang jingbam jong ka sorkar kmie.
“Katkum ka jingpyntreikam, T. 15 lak yn sa ai sha ka longïing jong u ne ka lanot kiba dei ki nongshong shnong jong ka ri lada jia ba ki ïap na ka jingshah thombor, T. 20 lak sha ki longïing jong ki shipai ïada ri kiba ïap kum ha kine ki jingjia bad T. 4 lak lada jia ba ki mynsaw na ki jingjia bad ngat ha ki jingduna dkhot met. Lada jia ba don kiba ïap na ki jingshah thombor ha ki lehnoh Maoist, na ka longïing jong ki kin sa don ki ban shah pynrung kam ha ka Post Class III/IV ha ka sorkar jylla,” la ong u Sarang.
