Shillong, Nailar 29
U Novak Djokovic un mih bujli ha jaka u Carlos Alcaraz na ka bynta ban ïai bat biang ïa ka kyrdan ba nyngkong ha ka pyrthei hadien ba u la khur ïa ka jingjop ha ka US Open.
Une u khlur ïalehkai na Serbia bad uba la shah rem ha ka final jong ka Wimbledon ha u Alcaraz, u la jop da 6-0 6-2 6-3 pyrshah ïa u rangïalehkai na France u Alexandre Muller ha ka miet jong ka Lah Sngi U Blei ha New York.
U Djokovic ba la 36 snem ka rta, um shym la ïoh ban ïalehkai ha United States ha u snem ba la dep na ka daw ba um shym la lah ban pyndep pura ïa ka jingai tika ïada Covid-19.
Une u rangïalehkai u la wanphai biang sha kane ka lympung da ka jingkhmih lynti ban ïaryngkat bad ka rekod kaba 24 ha ki lympung ïalehkai kiba heh ba la bat da ka khlur ïalehkai barim na Australia ka Margaret Court.
“Nga la sdang ban ïalehkai bha bad nga sngwkmen eh haba nga ïoh ban ïalehkai ha kane ka jaka kaba nga la ïoh ban ïalehkai teng ha ki snem kiba la leit,” la ong u Djokovic, u ban pynlut ïa ka por ban bteng ïa ki 390 sien ki jingjop ha kane ka taiew na ka bynta ban ïai bat ia katei ka kyrdan ba hakhlieh.
“Ha ka set kaba ar bad balai nga la sdang ban hiar ha ka rukom ïalehkai, hynrei nga la ïakhun tyngeh ban kamai point bad ha kaba kut nga la lah ban khur ïa ka jingjop.”
U Djokovic, uba ba la khur jingjop teng mynta u snem ha ka Australian Open bad French Open, u la khmih lynti ban khur ïa ka nam jop kaba saw ha Flushing Meadows bad un pynkhreh ban ïakhun pyrshah ïa u rangïalehkai na Spain u Bernabe Zapata Miralles ha ka wat kaba ar. Une u rangïalehkai un wanphai biang sha ka kyrdan ba nyngkong hadien kane ka lympung.
U Alcaraz ba dang 20 snem ka rta, u la khur ïa ka jingjop kaba nyngkong ha ka US Open ha u snem ba la la lah na ka daw ka jingbym don u Djokovic, un pynkhreh ban ïakhun pyrshah ïa u rangïalehkai na Germany u Dominik Koepfer.
