Shillong, Jylliew 19
Ka lympung FIFA World Cup 2026 ha ka 19 tarik Jylliew 2026 ka la bteng da ki katto katne ki jingïalehkai ha kaba ka Mexico ka la kylla long ka kynhun kaba nyngkong eh ban rung sha ka knockout Round of 32. Ka la pynskhem ïa ka jaka jong ka da kaba jop ïa ka South Korea da 1-0 kol ha madan Guadalajara Stadium, da ka jingthep kol ha ka minit kaba 50 da u Luis Romo hadien ka jingbakla jong u nongap kol.
Ka South Africa kaba don ha ka Group A ka dang don jingkyrmen hadien ba u Teboho Mokoena u la thep ïa ka kol ba la pynïakhaid ban pynlong ïa ka Czechia ban ïakhaid da 1-1 kol ha Atlanta.
Katba ha kawei pat ka jingïalehkai jong ka Group B, ka Canada ka la pynliem ïa ka Qatar da 6-0 bad kaba long ka jingjop banyngkong eh ha ka World Cup. Hynrei wat hapdeng ka jingjop ka la shah pynthut jur namar ka jingmynsaw jong u Ismaël Koné kaba shyrkhei bha kaba la jia hadien, uba la hap ban pynkit mar mar sha hospital na ka bynta ban shah sumar kyrkieh.
Ha kawei ruh ka jingïalehkai jong ka Group B ka Switzerland ka la thaw ïa ka histori ha ka World Cup hadien ba ka la jop da 4-1 kol ïa ka Bosnia and Herzegovina ha madan Los Angeles Stadium. Baroh san tylli ki kol la thep naduh ka minit kaba 74 shaneng, kaba la ïaid ka kum ka jingïalehkai kaba thep kol kham hadien ha ka histori jong ka FIFA World Cup.
Ki kol ka Switzerland la thep da u Johan Manzambi uba 20 snem ka rta u la ïoh thep kol ha ka minit kaba 74, katba u Rubén Vargas u la thep kol ha ka 84 bad 90 minit bad ka penalty kol la thep da u Granit Xhaka u kapten ka kyhun Switzerland katba ka shi kol ka Bosnia and Herzegovina la thep da u Ermin Mahmi? ha ka minit ba 90+2.
