Moscow, Nailar:
Ka tnat iada jong ka Russia ha ka Sngi Balang ka la pynbna halor ka jing-leit thombor ki drone na Ukraine ha ka Kad Liengsuiñ kaba don hapoh ka nongbah Pskov jong ka thaiñ Sepngi ha Russia. Ha kane ka jingjia 4 tylli ki liengsuiñ ki la julor ha katei ka jingleit thombor jong ki drone ba la phah da ka Ukraine ha katei ka sngi.
Katkum ba la ioh khubor, ym shym don kiba ngat ne mynsaw na katei ka jingjia ha katei ka sngi.
Ki lad pathai khubor ka Russia ki la iathuh ba 4 tylli ki liengsuiñ ‘Il-76’ ki la bthei bad julor ha ktaei ka jingther ‘namding jong ki drone ka Ukraine.
Ha katei ka jing bthei, la ong ba ka ding kaba khlaiñ ka la klang bad ïeng ha katei ka Kad Liengsuiñ ha ka por ba ki bor pyniaid ka Russia ki lap ia katei ka jingjia, ha ryngkat 2 tylli ki liengsuiñ kiba la ing bad shah bam duh ha katei ka ding.
Katkum ki video ba la pynsaphriang da ki nong Russia, la iohi ia ka tdem kaba rben bad kaba khlaiñ bha kaba kiew shalor suiñ na ka jaka ba don katei ka Kad Liengsuiñ ha katei ka thaiñ West jong ka Russia, ha kaba la ïohsngew ruh ia ka jingriew ki ktang suloi ha katei ka jaka.
Ka tnat iada jong ka Russia ka la iathuh ba ki don bun tylli ki ‘Anti-aircraft systems’ lane ki drone kiba leit rung sha kylleng ki bynta jong katei ka nongbah bad kham bun ha ki bynta khappud jong ka Latvia bad Estonia.
Kane ka long ruh hadien ba ka Ukraine ka la byrngem pyrshah ia ka Russia bad ong ba ka Ukraine kan pynphai kylla ia kane ka thma sha ka Russia kumba long ha Ukraine ha kine ki snem.
