Kolkata, Nailar:
Ka Myntri Rangbah jong ka West Bengal ka Mamata Banerjee ka la kynthoh jur ïa ka sorkar kmie hapoh ka jingïalam jong ka seng BJP halor ki rukom pyntreikam jong ka kiba long pyrshah ïa ki paidbah bad ong ba ka seng Trinamool Congress kan sa jynrat naduh tyllong ïa ka na ka bor synshar kumba ka la leh ïa ka seng CPI(M) kaba la lamkhmat ïa ka sorkar jong ka kynhun Left Front ha West Bengal.
“Ngi la weng ïa ka seng CPI(M) na ka bor synshar haba la i donkam ban leh kumta bad ka jingïakhun jong ngi mynta ka long ban weng ïa ka BJP na Delhi,” la ong ka Banerjee ha ka jingïalang ba la pynlong ha ka sngi ba la rakhe ïa ka sngi ba la seng ïa ka kynhun ki samla jong ka seng TMC ha ka lah sngi UBlei ha Kolkata. Ka la pynshisha da kaba ong ba ka jingbamsap ka la saphriang sha ka Union Ministry of Home Affairs bad ym shym la don kano kano ka kynhun jong ka sorkar kmie ban tohkit halor ka jingjia jong ka kam bamsap hapoh ki jylla ba la synshar da ka seng BJP.
“Nga buh ka jingkyrpad ïa baroh ban ïakhun pyrshah kum ki sing bad da ka jingshlur. Ka seng BJP ka lah ban don bun ka pisa naba ka la dep ban pynap shwa ïa baroh ki Hotel ha Dhupguri (North Bengal) na ka bynta ka jingdon jong ka ilekshon shiteng samoi ban pyntikna ba ym dei ban don ki Hotel ki ban lait na ka bynta kiwei pat,” la ong ka Banerjee.
