U Nongsaiñ Hima, 1966
Tang ban shu pynkynmaw –
“Uba rkhie la dei ban ïam,
Uba shngain la sah marwei,
Lada dei haduh ban mih snam,
Ha uta kin shaniah kiwei.”
Ioh ba ngi klet. Kane ka pyni ïa ka jinglong rangbah bad jinglong shynrang u briew. Kane ka dei ka mynsiem shynrang namar wei ba u briew u tip bad u nang ban shaniah ïalade, u tip ruh ba u lah ban ioh ïa ka jingsha-niah na kiwei. Kane ka jingshañiah ïalade ka wan na ka jinghikai bad jingïalam jong ki kmie ki kpa ïa la ki khun naduh ba ki dang rit.
Kam dei ka jingnang bad jingpnah ktien kaba kiwei ki lah ban shaniah, hynrei dei ka jinglong rangbah ka jingnang ban bat la ka kyntien wat la dei ban ïap ruh bad ka jingwad ïa ka jingshisha ba ïa u briew la pynlong ïa u, u rangbah.
Kumno yn lah ban shaniah ïa uta u briew uba lah ban kylla kumba kylla u bnai ha Suiñ bneng man la ka khyllipmat ? Kumno phin lah ban shaniah ïa uta u rangbah uba nang tang ka ktien hynrei haba dei ha ki mat ki mat pat u kynran dien bad u kylla jutang ? Kumno phin shaniah ïa uta u rangbah uba ksan rympei bad uba rem dorbar ? Khlem pep yn nym lah ban ai ïa la ka jingshañiah ha uba kum uta u briew.
Namar kata, ka ïing ka sem, ka jaidbynriew ki donkam ïa ki briew kiba long rangbah kiba wei haba ’em’ te ’em’ bad haba la ‘hooid’ te ‘hooid.
Ka ri ka donkam ki rangbah bad ka lawei ka ri ka dawa ba kine ki khynnah ki samla kiba mynta dei ban pynsan bad pynrangbah ïa ki ha ka rukom kaba dei bad ha ka rukom ba ki dei ban long ki khynnah bad ki samla kiba dei ban bha khala bad kyntiew ïa ka ri, ha ki la shai ki la shisngi bad ki ban long ki rishot jong ka. Lada ïa kine ki rishot la shah ïa kiba kim pyut naduh mynta khlem pep kata ka jaidbynriew bad kata ka ri kan kyllon bad man dpei.
Kane ka long ka jingkyntu kaba jur ïa ki kmie ki kpa jong ki ïing ki sem ban phikir bha namar kam biang tang ba la ai ka bam ka dih ne ka kup ka sem ïa kine ban pynshong skul hynrei lada ïa ka Nongim ka jingim, kata ka jinglong briew bad jinglong mynsiem jong ki khun la buh noh sha kyndong, khlem da ri bad sara bha.
