Moscow, Nailur:
Ka Russia ha ka Sngi Balang ka la kyntait ia ka jingkam jong ka Ukraine ha kine ki khyndiat por ba la leit ba ki shipai ka Ukraine ki la ioh kurup biang ia ka phang pdeng Andriivka jong ka nongbah Bakhmut ba la shah synshar bad hap hapoh ka kti ki shipai Russia naduh ki por ba la leit.
Ha katei ka sngi, la ong ba ka tnat ïada jong ka Russia ka la pynbna ba kitei ki bynta ba la kam da ka Ukraine ba la ioh kurup biang, ki dang hap hi hapoh ka kti jong ki shipai ka Russia bad ki shipai ka Ukraine kim pat lah satia ban pynmih ia ki shipai ka Russia na katei ka thaiñ wat hapdeng ka jingïakhun bad jing-aireng ba tyngeh jong ki naduh ki por ba la leit haduh kane ka kynti.
La ong ba ka Andriiv ka don sha ka phang South jong ka nongbah Bakhmut, kaba long ka thaiñ ba ki shipai ka Russia ki la ioh ban kurup naduh u Jymmang hadien ka jingïakhun ba shyrkhei hapdeng ki shipai ka Russia bad ki jong ka Ukraine ha katei ka por.
Hynrei la ong ba ka Ukraine pat ka la da pynbna ruh ia ka jingjop kaba khraw wat ha ki bynta South jong ka nongbah Bakhmut hajan jong ka Klishchiivka.
