Washington, Nailur:
Uwei u khynnah skul na Texas uba dei u doh-iong, u la shah sospon na skul haduh arsien kynthih tang namar jong ka rukom thaiñ shñiuh jong u ha ka dur ba ki bor pyniaid skul kim itynnad. La ong ba hadien ba u la shah sospon na skul ha ka sngi ba nyng-kong, ha ka sngi kaba bud pat u la leit phai biang sha skul ha kajuh hi ka rukom thaiñ shñiuh bad kumta u la shah suspon biang na skul sa ha kane ka sien kaba ar.
Ia utei u khynnah la ithuh kyrteng kum u Darryl George, uba long u khynnah ‘Junior’ jong ka skul Barbers Hill High School kaba don hapoh Mont Belvieu, bad u la shah pynshitom ruh da kaba shah phah thoh dak da ki spah sien bad nalor kata u la shah pynsangeh bad shah khang ban leit sha skul ha ka sngi kaba bud tang namar jong katei ka rukom thaiñ shñiuh jong u, la iathuh ka kmie jong utei u khynnah- ka Darresha George.
Ka Daressha ka la iathuh ba utei u khynnah u la shah sospon la arsien kynthih tang hapoh jong kajuh ka taiew bad kane ka long hadien ba la pyntreikam ia ka aiñ ‘CROWN Act’ ha kaba katei ka aiñ ka long ban pyllait na ka jingshah ñiew beiñ ne jingshah khang haba iadei bad ka rukom khap shñiuh bad rukom pynwan dur ia u shñiuh.
Ha kane ka khubor, la ong ba ki bor pyniaid jong katei ka skul ki la kynnoh ba ka rukom pynwan dur jong utei u khynnah ia u shñiuh, ka long pyrshah ia ki kyndon ba la buh da katei ka skul Barbers Hill Independent School District bad katkum ki kyndon ba la buh ha katei ka skul, ki khynnah skul shynrang kim lah ban ieh jrong ia u shñiuh hynrei ki dei ban khap lyngkot katkum ka rukom ba ju dei ia ki shynrang.
Kumta, ka Darresha ka la iathuh ba u khun jongka u don hapdeng ka jingkulmar jingmut bad ka jingkhuslai kaba khraw namar katei ka jingleh jong ki bor pyniaid skul namar utei u khynnah u la ju mlien bad sngewtynnad ban pynwan dur ia u shñiuh jong u ha katei ka rukom bad kam long hi ruh kaba i pher ne i kynsha naba baroh ki khynnah dohiong ki ju leh hi kumtei.
Katba la ong ba pat ba, kaba kham pynkhuslai ia katei ka longiing, ka long namar ba utei u khynnah u ju shah pynshitom man ka por. Hynrei, ka daw jong ka jingshah pynshitom jong u kam ju dei kaba don jingiadei eiei bad ka jing pule. Pynban ki daw ki long kiba shabar jong ka pule- puthi bad kane ka long ka bym lah ban pdiang.
Katkum ka jingiathuh jong katei ka kmie, la ong ba ha ka iing ka sem jong kitei ki jaitbynriew, baroh hi ki shynrang ki ju ieh shñiuh bad ki ju thaiñ ia u shñiuh ha ki rukom ‘Deadlocks’ kumba ju iatip paidbah bad katei ka rukom thaiñ shñiuh jongki, ka long kum ka jinglong tynrai bad ka rukom ngeit jong kitei ki jaitbynriew.
