New Delhi, Nailur:
U Myntri ka tnat kam pohïing jong ka sorkar kmie u Amit Shah ha ka sngi Balang u la ong ba ka jingbhah kaba kyrpang na ka bynta ki kynthei kam shym dei ka mat kaba ïadei bad ka kam saiñ pyrthei na ka bynta ka seng BJP kaba bat ïa ka jingsynshar hynrei ka dei ka jingburom.
U Shah u la ong ïa kane ha ka por ba u dang ai jingkren ha ka jingïatyrko nia kaba la long ha ka por ba la wan rah ïa ka Women’s Reservation Bill da ka sorkar kmie ha Lok Sabha ha ka sngi Balang.
U Shah u la ong ba ka seng BJP kam shym leh kam saiñ pyrthei ei ei ha kaba ïadei bad kane ka aiñ rew naba da ka jingmut kaba shisha ka la pyrkhat shaphang ki jingmyntoi jong ki kynthei ha kane ka ri.
Na ka bynta ki katto katne tylli ki seng saiñ pyrthei ki la ñiew ba ka jingpynkupbor ïa ki kynthei ka dei ka mat ba ïadei bad ka kam saiñ pyrthei, katba na ka bynta kiwei pat ka lah ban long na ka bynta ka jingthmu ban ïoh jingjop ha ka jingïakhun ilekshon.
