Toronto:, Nailur:
Ka sorkar Canada ha ka Sngi Palei, ka la kyntait ia ka jingpynbna jong ka India ba ka jinglong- jingman hapoh Canada ka long ka bym shngaiñ. Hynrei ka la ong ba ka Canada ka long pynban ka ri kaba shngaiñ bad ka long ruh kawei na ki ri kiba shongsuk- shongsaiñ tam ha ka pyrthei. Kumta ruh ka sorkar Canada ka la pyn jaijai bad pynshlur ia ki paidbah ba nabar jong ka Canada ruh ba ka Canada ka long ka ri kaba suk bad ba shngaiñ bad kim donkam ban sheptieng eiei watla ki la iohi ia ki jingïakynad hapdeng katei ka ri bad ka India ha kine ki khyndiat sngi.
Kane ka long hadien ba ka India ka la pynpaw ia ka jingsngewkhia halor ka jingbym pynsngap jong ka Canada wat hadien ba ka la kyntu ia ka Canada ban ialeh ban tehlakam ia ki kam thombor jong ki lehnoh bad ban ym ai jingiada ne ai jaka rieh ia ki lehnoh kiba don hapoh jongka namar ki long ka jingma ia ka hi bad kumjuh ruh ia kiwei pat ki para ri ba marjan.
