Washington, Nailur:
Ka White House ha ka Sngi Balang ka la pynpaw ba ka United States ka dap da ka jingsngew khia halor ka jingiapher jingmut hapdeng ka India bad ka Canada ha kane ka kynti bad kumta ruh ka la kyntu ia ka India ba kan iatrei lang bad ka Canada ha ka jingwad bniah halor ka jingpharep jong ka Canada ba dei ki briew jong ka sorkar India kiba ia don kti lang ha ka jingpyniap ia u lehnoh Khalistani ha Columbia ha kine ki khyndiat bnai ba la leit.
La ong ba u Myntri Rangbahduh ka Canada, u Justin Trudeau ha ka Sngi Nyngkong, u la pynbna ba ki kynhun wad bniah bad ki kynhun syntiat jong ka ri Canada ki suba ia ka jingiadon kti jong ki briew ba la phah da ka sorkar India ha ka jingpyniap ia u lehnoh uba long u nongshong shnong ka Canada, uba la shah siat iap ha u Jylliew ba la leit. Ia utei u lehnoh la ithuh kyrteng u Hardeep Singh Nijjar, uba dei na ka jaitbynriew Sikh hynrei uba long u nongshong shnong trai jong ka Canada.
Namar la ong ba ka la mih ka jingïakynad bad jingïashrut hapdeng ka India bad ka Canada ha kine ki khyndiat sngi ba la leit, hadien ba u Myntri Rangbahduh jong katei ka ri u la kynnoh ia ka jingiadon kti jong ka India ha ka jingpyniap ia utei u lehnoh Sikh uba la ioh jaka rieh bad ioh jingiada na ka Canada ha ki por ba la leit.
Kumjuh ruh na ka liang jong ka India, ka la pynpaw ia ka jingbitar halor ka jingshah pharep don kti ha katei ka jingpyniap ia utei u dkhot lehnoh uba ka India ruh ka la kwah ban kem bad uba la don kti ha shibun tylli ki kam thombor jong kitei ki kynhun lehnoh hapoh India. Katba, la ong ba ka Canada ka la ai jingiada pynban ia kitei ki lehnoh watla ki long ki nongshong shnong jongka hynrei kam pyrkhat pat ia ka jingma ba kitei ki lehnoh ki wanrah ia ki para ri ba marjan bad wat ia kito ki ri kiba ai jingiada ia ki ruh kumjuh.
