Islamabad, Nailur:
Katkum ki khubor la ong ba ia ka ilekshon paidbah ha Pakistan, la pynbeit ban pynlong ha ka taiew ba khatduh jong u Kyllalyngkot jong une u snem 2024 ban wan bad ia ki jingtip kiba bniah shaphang ki konstitwensi bad kiwei pat shaphang katei ka ilekshon, yn sa pynbna paidbah hadien ka 27 tarik u Nailur.
Kumjuh ruh la ong ba kino- kino ki seng ki lah ban phah ia ki jingpyrshah lane ‘Objections’ hadien ba ka Election Commission jong ka Pakistan ka la dep ban pynbit pynbiang ia ki jingdonkam baroh.
Hadien ba la ioh pat ia ki jingai jingmut bad jingpyrshah haba iadei bad ka thup jong ki seng bad ki kyrtong ki ban iakhun ha katei ka ilekshon, yn sa wanrah pat sa ia ka thup ba thymmai ha ka 30 tarik u Naiwieng bad hadien kata yn sa wanrah pat sa ia kiwei de ki kyndon bad ki mat ba iadei bad katei ka ilekshon ka ban sa long noh shen.
Kumta ruh la ong ba ha kaba kut jong ka jingjied bad jingpeit bniah bha ia ki konstitwensi bad ki jaka pynlong ilekshon shon baroh, kan don ka jingpynbna haba iadei bad ka jinglah ban pynlong ia ki jingialang paidbah bad ki jingïalap ilekshon ha kylleng ki bynta jong ka ri bad ia katei ka ilekshon pat la pynbeit ban pynlong ha ka taiew ba khatduh jong u Kyllalyngkot ha utei u snem 2024 ban wan.
Ia ka National Assembly jong ka Pakistan, la pynduh bor noh ha ka 9 tarik u Nailar bad kumba ju tip hi ba ia ka ilekshon paidbah pat la ju dei ban pynlong hapoh jong ki 90 sngi ba la dep ban pynduh noh ia ka National Assembly.
Hynrei kane ka la kham shim por namar ka jingbym lah ban pynithuh lut ia baroh ki konstitwensi bad kumjuh ruh ha kiwei ki liang kiba la wanrah jingeh ia ka Election Commission jong ka Pakistan ban pyndep ia ki kam ha ka por kaba biang kumba la thmu baroh bad la ong ba katei ka jingbym lah ban pynbiang ia ki kam ki jam ha ka por ba la buh, ka la wanrah ia ka jingsyier jong katei ka ilekshon ka lah ban shim por bad palat ruh ia ka por ba la buh ban pynlong ia ka.
Ka Konstitution ka la bthah ruh ia ka ECP ba kan pynbit pynbiang bad pyndep noh ia kitei ki kam basah jongka hapoh jong ki 120 sngi.
