Washington, Nailur:
U President ka Ukraine ha ka Sngi Palei u la ong ba lada ka Ukraine kam ioh jingkyrshan na ka United States, kan sa khyllem noh ha ka jingiakhun thma pyrshah ia ka Russia. Nalor nangta ruh u la ong ba dei lyngba jong ki Billion ki pisa bad ki jingiarap ba ka US ka la phah baroh shi katta naduh ba sdang ka thma, ba ka Ukraine ka la lah ban khie-khlieh bad ka lah ban ïeng haduh kane ka kynti.
Ha katei ka sngi, u nongialam ka United States- u Chuck Schumer u la iathuh ba u Zelensky u la ong ha u ba lada ka Ukraine kam ioh shuh ia ki jing-iarap na ka United States ha kine ki sngi ban wan, khlem pep kan sa khyllem bad shah rem ha ka Russia.
Namar kumba la iohi, ka United States ka la phah ia ki lad jingiarap bad kumjuh ruh ka pisa sha ka Ukraine naduh ba sdang jong ka thma ha u snem ba la leit haduh kine ki sngi bad kitei ki lad jingiarap jong ka US sha Ukraine ka la palat ia ka $100 Billion, kynthup ia $43 Billion ki tiar iakhun thma.
Hynrei, la ong ba ym lah pat ban tip haduh katno bad haduh lano ka United States kan dang lah ban ai jingkyrshan kumne ia ka Ukraine, khamtam haba ka ilekshon ka ban long ha u snem 2024 ruh ka la jan poi bad u Biden un hap ban iakhun ia u nongialam ban ialeh pyrshah ia u- u Donald Trump uba la buh thong ban ioh bat biang ia ka shuki President jong ka US ha utei u snem 2024.
Ka jingleit jurip jong u Zelensky sha United States ha kane ka por ruh ka long katba ka Russia ka dang pynjur ia ka jing-leit thombor da ki drone bad ka jingther ‘namding ba shyrkhei sha Ukraine, ha kaba bun ngut ki riew paidbah ki la khlad la jan man la ka sngi na kate ka jingthombor jong ka Russia.
Kumjuh ruh la ong ba ka United States ka la iathuh ba shen u President ka US- u Joe Biden un sa pynbna ia ka song jingiarap ba la mang na ka bynta ka Ukraine ha kine ki khyndiat sngi ki ban wan. Naba ka United States ruh kam nang ban shu ieh marwei ia ka Ukraine bad kumta ka pyrshang ban ai jingkyrshan bad ban phah ia ki lad jingiarap sha Ukraine na ka por sha ka por.
