New Delhi, Nailur:
Katkum ki khubor la ong ba ki don haduh kumba 9 tylli ki kynhun lehnoh kiba ioh jingiada na ka Canada wat la kitei ki seng lehnoh ki dei kiba la shah thwet bad don dak sniew ha kiba bun tylli ki ri. Katba ka Canada pat kam shym la leh eiei, hynrei ka la ai jaka rieh bad ai jingiada pynban ia ki na ka por sha ka por.
La ong ba ki seng lehnoh kum ka World Sikh Organization (WSO), Khalistan Tiger Force (KTF), Sikhs for Justice (SFJ) bad ka Babbar Khalsa International (BKI), kiba ju kham treikam bha hapoh Pakistan, la ioh jingtip ba kitei ki kynhun baroh ki ioh ban im laitlan hapoh ka ri Canada bad ka Canada kam shym don ba pyrkhing ne shim khia halor ka jingma kaba ap na ka jingdon jong kitei ki kynhun.
Ka Canada ha kine ki khyndiat sngi ba la leit, ka la kyntait ia ka jingmaham jong ka India bad katei ka ri ka long ka bym shngaiñ namar ka jingdon jong ki lehnoh bad ka long ruh ka ri kaba ai jaka rieh ia ki lehnoh. Hynrei ka Canada ka la kam ialade ba ka long pynban kawei na ki ri kaba shongsuk- shongsaiñ bad kaba shngaiñ tam ha ka pyrthei.
Kine baroh ki long hadien ka jingiakynad hapdeng ka Canada bad ka India haba iadei bad ka jing pharep jong ka Canada ba ki briew jong ka sorkar India ki iadon kti lang ha ka jingpyniap ia u lehnoh Sikh uba long u nongshong shnong ka Canada ha u Jylliew jong une hi u snem.
