Kumba 100 ngut ki Nongrep jong ka Krang Circle ki la ïashim bynta ha ka Training ba la pynlong da ka Khasi-Jaiñtia Farmers’ Association (KJFA) Krang Circle ha Community Hall ha Shnong Krang ha ka 20tarik mynta hi u bnai naduh 11 baje mynstep haduh 3 baje nohphai sngi. Kane ka long Katkum ka jingïathuh jong u Bah Kitbok Mawlein Secretary jong ka Krang Circle, KJFA.
Ki Nongai training ki dei I Kong Salva Buhroy, Horticulture Development Officer Mawphlang Block bad I Kong Nisha V. Kharjana, Assistant Technology Manager (ATMA), Sohiong Block. La don lang ruh u Bah T. Mawlong Horticulture Inspector Mawphlang Block.
I Kong Salva i la ïasyllok bad ki Nongrep halor Kumno ban rep ïa u Soh Kivi uba remdor bha, uba suk ban rep, bad uba ïadei bha bad ki jaka Khriat kum ha Sohiong, Nongthliew, KRANG bad Kiwei ki jaka khriat, rep jhur Sohmynken ha ki ïing plastik ban kham ioh kheit kham bun bad lah ban ioh plastik ha ka dor subsidy na horticulture hi bad kumno ban rep Sohplom ha ki buit ba kham bha ban ioh Soh Kham bha bad kham bun.
I Kong Nisha pat i la batai shai bad bniah bha ïa ka Rukom rep Kba ban lait na ka jingduhei ba kem jingpang, bam khñiang bad ka rukom ba kham bha naduh ki symbai, ban thung bad ban sara janai bha ha pynthor ryngkat ka jingdonkam ka um bad sboh ba pyndonkam. I la kyntu jur ban pyndonkam suki suki da ki Bio Fertilizers (sboh ñiut) ha ka jaka jong ki Chemical ferti-lizers (sboh dawai phareng) kiba la lap ba ki don jingma ïa ka jingkoit jingkhiah u briew bad wat ïa ki khñiang kiba pynbha ïa ki jingthung jingtep kiba don ha ka khyndew. I la hikai ruh kumno ban shna ïa ka sboh 18 sngi da ki nongrep ha ka la ki shnong bad ki jaka rep ban iarap ban ioh sboh lade bad kham pynduna na jinglut-ksan ban thied shi thied sboh.
ïa ka training Nongrep la ïarap da ka Meghalaya Farmers’ Commission ban kyntiew ïa ki Nongrep ha ka liang ban tip ïa ki buit rep thymmai.
Philip Marweiñ
