Shillong, Nailur 24
Ka Meghalaya Cricket Association (MCA) ka la pynbna ïa ka thup kyrteng kaba 15 ngut jong ki kynthei kiban mihkhmat ïa ka Jylla sha ka lympung Women’s U-19 One Day Trophy jong ka BCCI na ka bynta ka samoi 2023-24.
Kine ki ‘thei ïalehkai kiba la shah jied ki dei kiba la leh bha ha ka U-19 Girls Inter District Cricket Tournament kaba dang shu kut dang shen.
Kan don ka jingai jinghikai ban pynkhreh ïa kane ka kynhun ha ka jingleit ïashimbynta ha katei ka lympung, ka ban long naduh ka 25 tarik u Nailur haduh ka 3 tarik u Risaw ha Shillong bad ka jingïa-khun jong ka lympung ka BCCI ha Gujarat kan sdang naduh ka 8 haduh 16 tarik u Risaw.
Ki nongïalehkai bad ki Support Staff kiba la shah jied kin sa mih ha ka 5 tarik jong u bnai Risaw ban leit sha Gujarat ban ïashim bynta ha katei ka lympung.
Ki ‘thei ïalehkai jong ka jylla Meghalaya ki kynthup ïa ka Dian-chidora N Sangma, Dubleen D Nengnong, Indariakor Kharwan-niang, Fennysha Nongrum, Ankita Sharma, Kambesa Agitok, Abiezer Kharsyiem, Janicka R Marak, Monica Singh, Emisakani Warjri, Rikmanchi M Sangma, Jayshree Singh, Awesa G Momin, Jaylynn R Marak bad ka Natasha Rabha.
Ka Julitha Marak, Sistilin Ryntathiang, Banrikmen Lyngdoh bad ka Marme M Sangma kila shah jied kum ki ‘Standby’ bad ki Support Staff ki kynthup ïa Ranjana Yadav (head coach), Marty Mustafa (assistant coach), Helyna D Sangma (trainer), Lucky Mary Marbaniang (physio) katba ïa u Manager ym pat dep ban shim rai.
