Shillong, Ïaïong 29
Ka tnat ïalehkai jong ka Sorkar Jylla ka la pynpaw ïa ka jinglong la kloi ban ai jingkyrshan ïa ka Meghalaya Boxing Association (MBA) ha ka ban wanrah ïa ki coach kiba kynsai ba shabar jylla na ka bynta ban pynkhreh ïa ka kynhun kaba khlaiñ ha ka 39th National Games 2027 ha kane ka Jylla.
Ïa kane ka pynpaw da u Assistant Director ka tnat ïalehkai ka Sorkar Jylla u Bah Païa B War Nongbri ha ka jingïalang plie ïa ka State Junior (15-16 years) Boys & Girls and Youth (17-18years) Men & Women Boxing Championship 2025-2026, ha ka lah sngi U Blei ha Mawlai Mawroh.
“Dangshen ngi la shong jingïalang bad u Commissioner & Secretary ka tnat ïalehkai u Vijay Kumar ha kaba ngi la ïakren shaphang ka MBA namar ka long ka synjuk kaba biang bha na ka bynta ban saiñdur ïa ki nongïakura kiba dangkhie dangsan. Te kumta ngi buh jingtyrwa lada ka MBA ka sngew donkam ban wanrah ïa ki coach kiba kynsai kiba nabar jylla na ka bynta kane ka jingpynkhreh ïa ka National Games 2027 namar ka Sorkar ka long ba la kloi ban ai jingkyrshan ïa ka bad ban sei ïa ki nongïakura kiba kynsai.”
“Ngi kyntu ïa ka MBA ba kan kham pynleit jingmut bha na ka bynta katei ka lympung ka ban long ha Meghalaya na ka bynta ban sei ïa ki nongïakura kiba kynsai”
“Kum ki nongïakura ki donkam ban ïoh ka lad ban leit ïashim bynta shabar jylla lem bad ka jingshah hikai kaba paka, hynrei kaba kham kongsan ka long ba kin ïoh kham janai ka jingshah hikai na ki coach kiba kynsai khnang ba ki khynnah kin lah ban kynjoh sha ka thong bad ban wanrah burom ïa ka Jylla ha ka National Games 2027,” la bynrap biang u Bah Païa.
Kumba ka long mynta ki don kumba 40 ngut ki nongïakura kiba dangdon hapdeng ka jingshah pyntbit na ka bynta ban pynkhreh ïa katei ka lympung kaba heh jong ka ri ha u snem ban wan.
