Shillong, Ïaïong 29
Ka rynsan ïakura jong ka State Boxing Championship 2025-26 kan poi sha kaba kut ha ka sngi Palei ha kaba yn sakhi ïa ki nongïakura kiba kynsai ki ban ïaknieh ïa ki nam jop ha la ki jong ki kyrdan ha Mawlai Mawroh.
Ha ka sngi Balang la lah ban pyndep ïa ki jingïalehkai semi final ha kaba ki nongïakura kynthei bad shynrang ki la pyni ïa ki sap ïalehkai ba kyrpang. Ïa kane ka rynsan ïakura kaba la neh saw sngi lynter la pynlong da ka Meghalaya Boxing Association (MBA) ha ryngkat ka jingkyrshan lang da ka tnat ïalehkai ka Sorkar Jylla, ha kaba la phiah ha la ki jong ki kyrdan kata ka junior (15-16 snem) bad youth (17-18 snem).
Ha ka junior girls’ category 42-44kg, ka Isawanbiang Nongsiej (West Khasi Hills) ka la pynliem noh ïa ka Elizabeth Ngamlai (West Jaiñtia Hills) bad ka Soyabanri Nongrang (Eastern West Khasi Hills) ka la jop ïa ka Elishiba Marweiñ (Ri-Bhoi). Ha ka 44-46kg, ka Anisha Kharbani (EWKH) ka la jop ïa ka Pdianghun Kurbah (East Khasi Hills) bad ka Baïamonlang Lyngdoh ka la shah rem noh ha ka Nebadari Rympei (Ri-Bhoi).
