New Delhi, Nailur:
Katkum ka kaiphod ba la ioh lum da ki kynhun syntiat bad kynhun wad bniah jong ka India, u Hardeep Singh Nijjar, uba long u dkhot jong ka kynhun lehnoh ba la ioh jing-iada na ka Canada, la shem ba utei u lehnoh u la dep bthah ia ki briew jong katei ka kynhun jong u ban wan thombor sha India bad u la dep iadon kti ruh ha ki kam thombor hapoh India naduh ki snem 1980 bad u don jing-iadei ruh bad ki runar kiba shyrkhei naduh ka rta ba u dang khynnah.
La ong ruh ba u Nijjar, u la leit poi buhai shnong sha Canada ha u snem 1996 bad u la ioh ban im laitluid kum u riew paidbah, da kaba trei kum u nongñiah trok ha katei ka ri. Hynrei utei u lehnoh u ju leit pynpoi ia ki tiar siat sha ki lehnoh sha Pakistan da katei ka rukom bad u ju leit ruh ban iadon bynta ha ki jingpyntbit ha ki kam thombor hapoh Pakistan. Nalor kata, la shem ruh ba utei u lehnoh u la bthah ruh ia ki nongbud bad ia ka kynhun jong u ban leit thombor sha Punjab jong ka Pakistan, katba ialade pat u dang shong rieh tngen bad leh mynleh kum u riew paidbah hapoh Canada.
U Nijjar u long u nongshong shnong jong ka shnong Bhar Singh hapoh ka nongbah Jalandhar jong ka Punjab bad u la shah ialam bakla ha u Gurnek Singh alias Neka naduh ka por ba u dang kham khynnah. Ha ki snem 1980-1990 eiei, u la iadei kam bad ka Khalistan Commando Force (KCF) bad hadien u snem 2012 pat, u la iadon bynta sa bad u nongialam ka Khalistan Tiger Force (KTF)- u Jagtar Singh Tara. Hadien ba ka kyrteng jong u ka la paw pyrthei bad u la shah thwet na India ha kitei ki snem, u la phet noh pat sha Canada naduh u snem 1996.
La ioh jingtip ruh ba hadien ba u la phet sha Canada, u ju iadei kam bad u nongialam ka KTF- u Jagtar Singh Tara bad u la leit ban iadon bynta bad ki kam pyntbit bad jingkilan jong ki lehnoh Pakistan ha u Iaiong jong u snem 2012.
Hadien ba u la ioh long trai ri hapoh Canada pat, u la pynmih pisa naka bynta kitei ki lehnoh da kaba iadei kam bad ki nongkhaïi droks ha kylleng jong ka ri Canada.
La ioh jingtip ruh ba u Nijjar u la iasuh buit lang bad u Jagtar Singh Tara ha kiba bun tylli ki kam thombor hapoh Punjab bad u la pynheh ruh ia kawei ka kynhun runar ha Canada ha ryngkat bad katto katne ki runar kiba kynthup ia u Mandeep Singh Dhaliwal, Sarbjit Singh, Anupveer Singh bad u Darshan Singh alias Fauji bad kitei ki runar ki dei kiba la ioh jingpyntbit ha ki kam thombor na ki katto katne ki ri kum ka Britain, Columbia bad Canada ha ki snem 2015 eiei.
Kumta, la ong ba ha u snem 2014, la ioh jingtip ba u Nijjar u la thmu ban phah leit thombor ha ki Headquarter jong ka Dera Sacha Sauda hapoh ka nongbah Sirsa jong ka Haryana, hynrei um shym lah pat ban pynpoi ialade sha India. Kumta, u la phah noh ia ki kynhun jong u ba kin leit thombor ia u Mohd Izhar Alam uba long u DGP barim, kumjuh ruh ia u nongialam ka Shiv Sena ha Punjab- u Nishant Sharma bad u baba Mann Singh Pehowa Wale.
Shuh shuh ruh la ong ba u Nijjar u la iatrei lang ruh ba uwei u runar ba shyrkhei na Punjab- u Arshdeep Singh Gill alias Arsh Dala na Moga ban pynjur ia ki kam thombor hapoh Punjab.
