Arizona, Nailur:
Kawei ka longkmie na ka nongbah Arizona jong ka United States, ka la shah kem noh hadien ba ka la siat ïa la u jong u kurim na ka daw ka jingïakynad halor ka jingiaphet lok. Ka Prescott Police Department ka la iathuh ba katei ka longkmie, kaba la ithuh kyrteng ka Christina Pasqualetto, ka la shah kem bad shah pynngat noh ha ki katto katne ki kyndon pynkheiñ aiñ kiba iadei bad ka jingpyniap briew namar ka jingthmu pyniap jong ka ïa utei u briew ha katei ka jingjia.
Kane ka la jia ha ka 20 tarik u Nailur, ha kaba katei ka longkmie 62 snem ka rta, ka dang wan phai na Gilbert sha ka iingsah jongka ha Prescott, kaba long ka iing ba ka ju iashong- iasah ryngkat bad utei u kurim jongka- u Jon pasqualetto. Hynrei katei ka iing ka long ka jong utei u kurim jongka bad hadien ka jingleit poi jongka ha katei ka miet, ka la mih ka jingïakynad hapdeng kitei ki shijur halor ka jingiaphet lok jongki bad la ong ba ka daw jong katei ka jingjia ka long namar ba utei u kurim u la kwah ban iaphet noh badka, katba ma ka pat kam shym kwah kumta. Kumta, katei ka briew ka la siat ïa utei u kurim katba u dang thiah ha jingthiah ha katei hi ka miet.
La ong ba utei u tymmen 80 snem u la shah siat na ki bynta jong ka ryndang kti bad hadien katei ka jingjia, la pynkit noh ïa u mar-mar sha ka jaka sumar bad la pynkynriah noh ïa u hadien sha ka jaka sumar ha Phoenix. Hynrei la ong ba u Jon um shym la don kino- kino ki jingma ne jingmynsaw kiba jur bad ka jinglong- jingman jong ka met jong u ka biang beit hadien ba la dep ban ioh ïa ka jingsumar ha katei ka por.
Ka Christina ka la iathuh ba ha katei ka miet haba ka la leit ban kylli shai ïa u la u la pyrkhat bha ne em halor katei ka jingkwah jong u ban iaphet lok noh na ka, hynrei la ong ba utei u tymmen um shym la kylla jingmut ne pyrkhat shuh da kumwei kumba u la rai ban iaphet noh badka bad kane ka la pynkem bitar ïa ka bad dei ha katei ka por ba ka la sei ïa ka suloi rit bad siat ïa u katba u dang thiah ha katei ka jingthiah ba ka leit ban iakren.
Shuh shuh ruh la ong ba hadien ba u la shah siat ha katei ka miet, u la iakhun bad ioh knieh ïa ka suloi na ka kti jong katei ka briew ha katei ka por bad u la ioh ban phet krad
Nalor kata, la ong ba utei u tymmen u la dep ban phah buh da ki jingkhang tala ba thymmai hadien jong ka jingiaphet jongki, hynrei ki shabi bad kiwei de ki jingdon- jingem jong u ki la jah rngai lut. Kumjuh ruh u Jon u la iathuh ha ki pulit ba ka Christina ka la tuh ïa ka ‘Check’ bad ka la ioh sei ruh ïa ka pisa kaba $10,000 kaba dei hok ka jong u.
Hadien ka jingtohkit bniah jong ki pulit, katei ka briew ruh ka la phla ba ka la tuh ïa katei ka ‘Check’ bad ka la pyndonkam ïa katei ka pisa ba ka la shim tuh na ka iing u kurim jongka ha kitei ki khyndiat sngi ba la leit.
