Washington, Nailur:
Ka United States ha kane ka por ka la pyntip ba kam kwah ban tuklar hapdeng ka jingïakynad bad jingiapher jingmut hapdeng ka India bad Canada bad kumta ruh kan ialeh katba lah ban kiar na katei ka mat kaba lah ban ktah jur pynban ïa ka jinglong-jingman hapdeng kitei ri bad kumjuh ruh khnang ba ka jing-iadei hapdeng ka India bad United States pat kan ym don jingthut eiei bad kan iaid beit-iaid ryntih kumba ju long man ka por. Namar la ong ruh ba ka United States ka ju pyrshang katba lah ban kyntiew ïa ka ri India khnang ba kan lah ban kot bor bad ka China ha ki liang kiba bun, hynrei ka US kam kwah pat ban tuklar haba iadei bad katei ka bynta hapdeng ka jingiadei jong ka India bad Canada ha kane ka por.
Kumba la iohi hi ba ka jingiadei hapdeng ka India bad ka Canada ka la tlor noh hadien ka jingshah siat iap u Hardeep Singh Nijjar uba la shah siat ha ka 18 tarik u Jylliew hapoh Surrey, kaba long ka shnong hapoh Vancouver. Kane ka long hadien ba u Myntri Rangbahduh ka Canada, u Justin Trudeau ha ki khyndiat taiew ba la lah, u la ong ba ka don ka jing artatien ba ka India ka lah ban ïadon kti lang ha ka jingpyniap ïa utei u lehnoh uba long u nongshong shnong trai ka Canada. Kumta, la ong ba ka Canada ka pynpaw ïa ka jingpyrshah jur halor ka jingleit ïadon kti jong ka India ha ka jingpyniap ïa utei u nong Canada bad kata ruh ka long hapoh u pud- u sam jong ka Canada.
Kumjuh ruh u Secretary of State jong ka United States, u Antony Blinken ha ka taiew ba la lah, u la kyntu ïa ka India ba kan iatrei lang bad ka Canada ha katei ka jingwad bniah ban lap la ki briew jong ka India ki ïadon kti lang ne em ruh ha katei ka jingleit pyniap ïa utei u lehnoh hapoh ka ri Canada.
Katba, na ka liang jong ka sorkar India, ka la kyntait ïa ka jingleit ïadon kti jong ki briew jongka ha katei ka jingpyniap ïa utei u lehnoh, khamtam ba ka long ruh hapoh u pud- u sam jong ka Canada. Watla ïa utei u lehnoh, ka India ka la jer kyrteng ha ki bun tylli ki kam thombor kiba utei u lehnoh u la don kti. Hynrei ka India ka la kyntait pat halor ka jingshah kynnoh jong ka jingiadon kti jongka ha katei ka jingleit pyniap ïa utei u lehnoh ha katei ka jingjia.
