Shillong, Nailur 27
Ka jingpule bad ka kam ïalehkai ki long ki bynta kiba kongsan eh, hynrei ha u Lber mynta u snem ka Sift Kaur Samra ka la shim ïa ka rai ban pynleit jingmut beit tang ha ka kam siat suloi khnang ban kynjoh sha ka thong bad kane ka long kum ka jing-ai mynsiem ïa kiwei ki para nongïalehkai.
Lyngba kane ka jingjop ka la pynlong ïa ka India ban khur 22 tylli ki takma, kata 5 ki takma ksiar, 7 ki takma rupa bad 10 ki takma rnong.
Katei ka nongsiat suloi kaba dang 23 snem ka rta, ka la ïehnoh ïa ka jingpule MBBS ka jong ka na ka bynta ban pynleit jingmut pura ha ka kam siat suloi. Kane ka rai ka la wan urlong ha ka sngi Balang ha kaba ka la lah ban khur ïa ka takma ksiar ha ka jingïakop siat suloi kaba 50m rifle 3P jong ka Asian Games kaba la long ha Hangzhou.
Ha kaba nyngkong ka Samra ka la pynleit jingmut lang ha ka jingpule MBBS ha ka GGS Medical College kaba ha Faridkot bad kumjuh ha ka shooting, hynrei kane ka rai ka la wanrah ka jingkylla ha ka jingim jong ka.
“Nga la ïehnoh ïa ka jingpule MBBS ha u Lber. Mynta nga dangpule ruh ïa ka Bachelor of Physical Education and Sports na GNDU kaba ha Amritsar,” la ong ka Samra hadien ba ka la lah ban thaw ïa ka khana da kaba khur ïa ka takma ksiar ha ka Asian Games bad ka la khur ruh ïa ka rekod ha ka pyrthei.
Kumba ka paw hapoh ri India, kiba bun na ki longïing kiba biang ha ka ïoh ka kot ki kwah ïa la ki jong ki khun ba kin pynleit jingmut tang ha ka jingpule. Hynrei ka Samra ka la long ka jingkyrkhu namar ka don ïa ki kmie ki kpa kiba kwah ïa la ka jong ka khun ba kan khur ïa ka rekod ha ka jingïakop siat suloi.
Halor ka jingkylli ba na kaei ka daw ba ka la ïehnoh ïa ka jingpule MBBS, hynrei ka jubab jong ka, “Ngam tip. Ka dei ka rai jong ki kmie ki kpa. Ïa mynta ngam la ban leh eiei. Hooid nga lah ban leit sha ka Civil Services ruh.”
Kane ka nongïalehkai kaba dang 23 snem ka rta kaba na Faridkot, Punjab ka la ong ba ka dei ka jingjia ryngkhat ba kan long kaba paw kum ka nongïalehkai siat suloi ba kynsai jong ka ri India.
“Kane ka dei ka jingjied ban long kum ka nongsiat suloi. Kum ka nongsiat suloi, kawei na kiba haïing jong nga ka la ju batai ïa nga shaphang ka jingïaleh-kai siat suloi. Ha kaba nyngkong nga la lah ban ïalehkai bha ha ka state level bad na ka liang kiba haïing jong nga ki la pynbor ïa ki kmie ki kpa jong nga ba nga dei ban ïalehkai ha ka Shooting. Nga sngewkmen ba kane ka urlong bad nga la long kum ka nongsiat suloi,” ka la bynrap da kaba pynpaw ba ka la sdang na ka 10m bad hadien ka la jam sha ka 3P.
“Nga la ïashim bynta nyngkong ha ka 10m ha ka por ba nga la sdang ha u snem 2016-17 bad ka 3P ka dei kaba nga lah ban jam shaphrang ha ka kam ïalehkai. Nga la sdang ïa ka 3P ha u 2019.”
Halor ka jinglah ban pynliem ïa ka lahduh ha ka pyrthei, ka Zhang Qiongyue kaba na China, ha kaba ka la khur ia ïka takma rupa, ka Samra ka la ong, “Nga la ïoh shibun ki jingmyntoi ha kane ka jingïakop pyrshah ïa ki nongïalehkai na China. Ki dei kiba la iashim bynta ha ka World University Games (dangshen mynta u snem ha Chengdu) bad nga la khur ïa ka takma ksiar.” Ka Samra kam shym la poi pyrkhat ba kan lah ban thaw ïa ka rekod ha ka pyrthei ha ka sngi Balang, hynrei la pyntip ïa ka da ki coach.
“Ha ka World University Games (kaba la long ha Chengdu, China ha u Nailar) ma nga bad ka Ashi ngi la khur ïa ka takma ksiar bad rupa, hynrei mynta ngi la khur ïa ka takma ksiar bad rnong, ka long kaba biang eh ka jingiaid ïlynti ka jong ngi ha ka kam ïalehkai.”
