Shillong, Risaw 02
Ka kynhun ïalehkai jong ka H.K. Sing Secondary School ka la bteng ban khur ïa ka jingjop ba ar ha ka kyrdan ïalehkai Under-14 jong ka 62nd International Subroto Cup Football Tournament.
Kane ka la wan urlong hadien ba ka lah pynliem noh ïa ka Kendriya Vidyalaya Sangathan (KVS) kaba na Maharashtra da 1-0 kol ha ka Lah Sngi U Blei ha Bengaluru.
Kane ka kynhun ïalehkai kaba na West Jaiñtia Hills hapoh ka jingïalam u Bah Hopingstone Suting (coach) ka la pyrshang ban ïalehkai bha naduh kaba sdang lem bad ka liang pyrshah, hynrei kim shym la lah ban pynkhih jar haduh kaba kut jong ka kylla step.
Wat la ka H.K. Sing ka la lah ban pynliem ïa ka Sainik School haduh 3-0 kol, hynrei ha kane ka jingïakhun kaba ar ka la shem jingeh ban thep kol. Hynrei dei ha ka kylla miet ba ka la ïoh ban pynkhih jar lyngba u Markatjuh Shylla ha ka minit kaba 47. Haduh kaba kut ka KVS kam shym la lah ban pynphai bad ka la mad ïa ka jingshah rem.
Lyngba kane ka jingjop kaba ar, ka H.K. Sing ka la don jingkyrmen ban jam sha ka quarter final na ka Pool-A bad ka donkam ban ïalehkai bha ha ka jingïakhun kaba khatduh pyrshah ïa ka IPSC ha ka 4 tarik por 2 baje jamiet.
