Kathmandu, Risaw:
Katkum ki khubor la ong ba napdeng kito kiba khlad ha ka jingleit thombor ki lehnoh Hamas hapoh Israel ha ka Sngi Saitjaiñ, 10 ngut ki dei ki nong Nepal kiba don lang ha katei ka kynhun ki nong Israel.
Haba iakren lyngba ka phone ha ka janmiet Sngi U Blei, u Secretary jong ka Nepal Embassy hapoh Israel- u Arjun Ghimire u la ong ba ki pulit ka Israel ki la dep pyntikna ba la lap ia 10 tylli ki metiap jong ki nong Nepal napdeng jong kitei kiba khlad ha katei ka sngi. Don shuh shuh ruh ki nong Nepal kiba dang jah bad ym ioh jingtip shuh shaphang jong ki bad don pat kiba la mynsaw jur ha katei ka jingshah thombor ha ki lehnoh Hamas ha ki khyndiat sngi ba la leit.
Ha kajuh ka por, u Myntri ka tnat kam bar ri jong ka Nepal- u NP Saud ha katei ka Sngi U Blei u la ai jingtip ba ki don ki nong Nepal kiba lah ban shah ktah bad ki ban ngat ha katei ka jingleit thombor jong ka Hamas hapoh Israel.
Namar la ong ba ki don kumba 265 ngut ki khynnah pule ka Nepal kiba leit ban ïadon bynta ha ka jingai jinghikai bad jingpule ba kyrpang hapoh Israel, kaba la pyniaid da ka Sorkar Israel. Ki don ruh kumba 4,500 ngut ki nong Nepal kiba trei ha kylleng ki bynta jong ka ri Israel.
Napdeng jong kitei ki khynnah pule pat, 199 ngut ki dei na ka Agriculture & Forestry University, 97 ngut na ka Tribhuvan University bad 49 ngut na ka Far-Western University. Kumba 17 ngut napdeng kitei ki 49 ngut kiba pule ha ka Sudurpaschim University pat, ki dei kiba pule hapoh Kibbutz Alumim, kaba don sha ka thaiñ South jong ka Israel.
Katkum ka jingioh jingtip na ka tnat ba dei khmih ia ki Nepali hapoh Israel, la ong ba ka Kibbutz Alumim ka don hajan jong ka thaiñ ba don ki Gaza hi, bad katei ka jingshah thombor ha ka kynhun Hamas, napdeng ki 17 ngut ki khynnah pule ka Nepal kiba don ha katei ka bynta, 2 ngut la pyntikna ba ki la lait na ka jingma bad 4 ngut pat ki la mynsaw na katei ka jingshah thombor ka Israel ha katei ka sngi bad haduh kane ka kynti ki dang don hapoh ka jingsumar hapoh Israel hi. Katba, ia kitei ki 11 ngut kiba dang sah pat, ym shym la ioh jingtip shaei ki don bad kaei kaba la jia ia ki ha kum katei ka por ba kynsan- kynsan ka Israel ka la shah thombor ha kitei ki kynhun.
Kumta, la ong ba ka Sorkar Nepal ka la ioh ban iakren bad ka Sorkar Israel ban iatrei lang naka bynta ki jingdonkam jong kitei ki nong Nepal kiba dang sahkut ha katei ka ri bad kumjuh ruh ban ioh pynpoi noh ia ki sha Nepal ha ka por kaba biang.
Ha ka Sngi Saitjaiñ, u Myntri Rangbah ka Nepal- u Pushpa Kamal Dahal, u la pynrem jur halor ka jingleit thombor jong ki lehnoh Hamas pyrshah ia ka Israel bad ha kajuh ka por ruh u la phah ia ka khubor sngewlem sha ki bahaiing- hasem jong ki nong Nepal kiba la khlad ha katei ka jingjia bad u la kular ruh ba ka Sorkar Nepal kan ialeh katba lah ban ai jingiada ia ki paidbah nongshong shnong jongka bad ban ioh pynpoi noh ia kitei ki nong Nepal kiba dang sahkut ha Israel ha ka por kaba biang.
Ka tnat ka koit ka khiah jong ka Israel, ka la pyntip ba kumba 2156 ngut ki la mynsaw bad ki dang don hapdeng ka jingsumar hapoh ki jaka sumar bapher jong ka Israel tad haduh jong ka step Sngi U Blei, kynthup ia 20 ngut kiba la don ha tmier ka jingïap bad 338 ngut pat kiba la mynsaw jur.
