Gaza, Risaw 09 (UNI)
Palat 1.23 lak ngut ki nong Palestine ki la hap ban phet na ki ïing ki sem jong ki kiba don ha Gaza Strip naduh ba ka jingïakynad hapdeng ka Palestine bad Israel ka la sdang, la ong ka United Nations Office for the Coordination of Humanitarian Affairs (OCHA).
“Haduh ka por 9 baje mynmiet jong ka Sngi U Blei, 123,538 ngut ki nong Palestine ki la hap ban mih noh na ki ïing ki sem ha Gaza,” la ong ka OCHA ha u kyrwoh khubor.
Ka Israel ka la shah thombor da ki ‘nam ding na Gaza Strip ha ka Sngi Saitjaiñ. Ki shipai Israel ki la ong ba ka kynhun lehnoh Hamas ka la ther palat 3,000 tylli ki ‘nam ding bad ki dkhot jong ka ki la wan rung na ki bynta ba Shathie jong ka Israel ban thombor ïa ki nongshong shnong.
Ka sorkar Israel ka la phah ïa ki shipai ki swar jong ka sha ki thaiñ Shathie ban ïakhun ban ïoh knieh biang ïa ki jaka ba la thombor da ka Hamas. Nalorkata, ka Israel ka la ther da ki ‘nam ding ha Gaza ban pynhiar kput ïa ka jingthombor ki dkhot ka Hamas.
Ka sorkar Israel ha ka Sngi U Blei ka la pynbna ba ka pyntreikam da ka Article 40 jong ka Basic Law kaba mut ba ka Ri ka la don hapdeng ka thma.
