Shillong, Risaw 11
Ka PFR Football Academy ka la bteng ïa ka jingjop ba ar ha ka SSA SRGT 3rd Division Football League 2023 hadien ba ka lah pynliem noh ïa ka Mawshbuit SC da 2-0 kol ha ka sngi Balang ha SSA Stadium, Polo.
Kane ka nam jop ka la wan urlong lyngba ki kol ba la thep da u Fleming Suting ha ka minit kaba 44 bad ïa kawei pat la thep da u Andy Suting ha ka minit ba 55.
Da kane ka jingjop kaba ar, ka PFR ka la bat ïa ka kyrdan ba hakhlieh na ka Group-B ha kaba ka la kamai 6 point na ki ar sien ïakhun.
Ha ka jingïakhun kaba ar, ka Umpling SC ka la ïasam mar shi point bad ka Lumparing SC hadien ba ki la ïakhaid mar 2-2 kol.
Tang mar ïasdang ka jingïakhun Umpling ka la ïoh ban pynkhih jar nyngkong eh lyngba u Klinton Roy Mylliemumlong ha ka minit kaba 5. Hynrei hadien san minit ka Lumparing ka la lah ban pynphai kylla lyngba u Gilbert Nongneng hashwa ba un pynbud ïa ka kol kaba ar ha ka minit kaba 22.
Hashwa ban wai ka Umpling ka la thep biang sa shi kol lyngba u Donbok Sing L. Lyngkhoi ha ka minit kaba 80 na ka bynta ban ïakhaid mar ar kol.
Haba phai sha kawei pat ka jingïakhun kaba khatduh kaba la long ha madan Third Ground, ka Sanmer SC ka la pynliem noh ïa ka Mylliem Lum SC da 2-1 kol.
Kane ka nam jop ka la wan urlong lyngba u Babitdor Dorphang, uba la ïoh ban thep ar kol ha ka minit kaba 47 & 73. Hynrei ka Mylliem Lum ka la lah ban pynphai kylla shi kol lyngba u Michael Kurbah (71)
Haba phai sha ki jingïakhun myn ha ka sngi Ba-ar, ka Krang SC ka la pynliem noh ïa ka Lapalang SC da 2-0 kol. Ïa kine la thep da u Labyntalang Nongphlang (69) bad u Willjohn Kyrsien (78).
Ka Meghalaya Police Football Team ka la khur ïa ka jingjop kaba nyngkong hadien ba ka la pynliem noh ïa ka Gorkha Association da 2-0 kol. Ïa kine la thep da u Kommanwell Nongrum (19) bad u Bikram Chettri (61).
Ka Mawryngkneng SC ka la ïasam mar shi point bad ka Nongkseh SC hadien ba ki la ïakhaid mar 2-2 kol. Na ka Mawryngkneng la thep da u Brokenstar Warmalai (50 & 56), hynrei ka Nongkseh ka la lah ban pynïakhaid kylla lyngba u Banteilang Synnia (75 & 80).
Kane ka lympung kan bteng biang ha ka sngi Palei ha kaba ka Tynring SC kan ïakhun pyrshah ïa ka Nongumlong SC ha ka por 1:10, ka Umlyngka SC ïa ka Gorkha Association ha ka por 3 baje (ki ban ïakhun ha ka SSA Stadium), katba ka Lumdiengjri SC bad Lawmali Pyllun SC kin ïakhun ha Third Ground ha ka por 3 baje janmiet.
