Shillong, Risaw 16
Ka Meghalaya Football Association (MFA) ka la pynshai ba ha kaba ïadei bad ka jingrai ban siew dep ïa ka pisa kaba sah sha baroh ki kynhun kiba ïashim bynta ha ka Amateur League ka dei lyngba ka jingrai da ka synjuk barim.
Ïa kane la pynpaw da u General Secretary bathymmai kane ka synjuk u Bah Sunesh Syiem bad ïa katei ka rai yn sa rah shwa ha ka jingïalang jong ka synjuk kaba thymmai ka ban sa long shen.
Ka jingpynlong ïa ka Amateur League ka dei kaba la shu leh donbor tang da ki ar ngut ki dkhot barim, hynrei ym shym la lah ban pyndep wat la sdang naduh u Jylliew jong u snem 2022.
Te kumta dangshen na ki liang 20 tylli ki kynhun ki la dawa ba pynphai noh ïa ka bai rung kaba ki la dep siew sha ka MFA. “Na ka liang ka synjuk kaba rim jong ka MFA ka la rai ban pynphai noh ïa ka pisa kaba sah sha baroh ki kynhun ïalehkai,” la ong u Bah Sunesh.
“Kum u Convener uba mynshwa jong ka MFA uba ïadon bynta ha ka ban ïa pynbeit ïa ki jingeh ha kaba ïadei bad ka Amateur League, ka dei ka kamram ka jong nga ba ngan wanrah ha ka jingïalang jong kane ka synjuk kaba thymmai ka ban sa long shen,” u la bynrap.
“Ka synjuk kaba rim ka la dep leh la ka kamram ha kaba ïadei bad ki jingkheiñ jingdiah na ka bynta ka Amateur League bad ka la rai ban pynphai noh ïa ka pisa kaba sah sha baroh ki kynhun ïalehkai. Mynta kan shong sa ha ka synjuk kaba thymmai na ka bynta ban leh ïa kaba donkam,” u la bynrap.
Kum ban shu pynkynmaw, ka MFA ka la dep ban pynlong ïa ka ilekshon ha ka sngi Saitjaiñ ban pynthymmai ïa ki nongkitkam na ka bynta ka samoi treikam kaba saw snem kynthih.
