Shillong, Risaw 18
Kan dei ka sien kaba nyngkong eh ba ka Meghalaya Motorsports Society (MMS) kan pynlong ïa ka prokram ban pyni ïa ki sap ñiah kali ba la tip kum ka “The Drift Show” ka ban long ha ISBT, Mawïong ha ka 20 bad 21 tarik mynta u bnai.
Ha kane ka jingïakop ñiah kali yn wan ïashim bynta lang da uwei na ki nongñiah kali ba paw jong ka ri u Sanam Sekhon (The Drift King of India). Kane ka long ka sien kaba nyngkong eh ba ka tnat ïalehkai jong ka Sorkar Jylla ka la ïadon bynta lang ha kane ka jingpyni sap.
Ka Chairperson jong ka Meghalaya Motor-sports Society ka Kong Phoebe Nongrum haba ïakren bad ki lad pathai khubor ka la long pynpaw ba kane ka jingïakop ñiah kali ka long shi bynta ban plie lad ïa ki khynnah samla ba kin pyni ïa ki sap ñiah kali.
“Kin don kiwei pat ki nongïashim bynta ha ka jingpyni ïa ki sap ñiah thuk thuk, skateboard bad ka scooter stunt. Yn wan ïashim bynta kawei ka kynhun kaba na Guwahati ha ka ban pyni ïa ka sap ñiah thuk thuk.”
