Mawkyrwat, Risaw 25
Ka Tournament Committee jong ka Mawlangwir Sport Club ka la pynkhreh shaid shaid ban sdang noh ïa ka lympung ïalehkai phutbol kaba heh duh ha ka distrik bad ka song pisa baroh ka kot sha T.15 lak ïa kaba la tip kum ka Mawlangwir Football Invitation Tournament 2023- 24 hapoh Rowell Lyngdoh Stadium kaba ha madan Saitsnad, Mawlangwir.
Haba ïakren bad lad pathai khubor ha ka sngi Balang, u Bah Koland Lyngdoh, Secretary ka Tournament Committee ka MSC u la ïathuh ba ïa kane ka lympung yn sa sdang ha ka 28 tarik mynta u bnai ha ka por 1 baje nohphai sngi ha kaba ka kynhun ïalehkai jong ka North East United FC kan ïakhun pyrshah ïa ka Shillong Lajong FC.
U la ïathuh ba kumba ka long mynta ka Mawlangwir SC ban pynsuk ïa u paidbah nongpeitkai ka la shna shuh shuh ïa ki jaka shong da kaba antad ba ka lah ban ngiam haduh kumba san hajar ngut eiei ki nongpeitkai.
U la ïathuh ruh ba kum shi bynta ban pynbyrngia ïa u paidbah, ka MSC ha ka sngi sdang kan wanrah ruh ïa ki nongshad bad ki nongrwai ba pawnam ka Jylla.
Ka Mawlangwir SC ka la pyntip ruh ba ka dor jong ka bai tiket kan long T. 150 marwei bad ha katei ka sngi yn teh ruh ïa ki giant screen ha madan.
Kumta na ka liang ka MSC ka khot bad wer ïa ki paidbah riewïeit phutbol jong ka dong ka thaiñ bad ka jylla ba kin wan ban sakhi ha katei ka sngi sdang ka ban plie pyrda da u Bah Ardent Miller Basaïawmoit, MLA ka Nongkrem Constituency.
Kiwei pat ki kynhun ki ban ïashim bynta ha kane ka lympung ki long ka Meghalaya Police (MLP) F.C na Shillong, Nongbri FC na Mawkyrwat, Benris FC na Ri Bhoi, Himal FC, Dibhugarh, Smit FC Shillong, KMC FC, Sonapur Assam, Langsning FC na Shillong, Khlieh Mawlieh FC, Nongstoiñ, Golden Lion FC, Rymbai, Barak FC na Nagaland, Tura United Football Club, Aphuyemi FC na Nagaland, 7 Wasa FC na Jowai bad ka Imphal FC na Manipur.
Kum ban shu pynkynmaw ka lahduh ha kane ka lympung kan ïohpdiang ïa ka khusnam kaba T. 10 lak, katba kaba wan ba-ar kan ïoh T. 5 lak nalor kiwei pat ki khusnam kyrpang.
