Shillong, Risaw 29
Ka rakhe lyngkhuh arphewsan snem jong ka Dorbar Seng Kur Warjri ka la sdang naduh ka Dorbar Kur ba la long ha Sohryngkham mynshem snem bad la pynlong kiwei kiwei ruh ki rong ki taw barabor kum ka jingpyninam ïa ki syntiew, ka thohdur, ka thoh essay bad poetry, ka shad ka rwai bad ki rukom lehkai kilan met kum ka phutbol bad basketball.
Haba phai sha ka jingïalehkai Football, la pynïaid da u Bah Prosperous Warjri bad Bah Rodson Warjri bad ïa ka Basketball la pynïaid da ka Kong Jeanita Warjri bad u samla Barikupar Warjri.
Ha ka Football ki la don haduh khatar tylli ki kynhun na ki shnat Upper Shillong, Wahlang, Manai, Pyndemumiong, Thynroit, Mawphlang, Mawkneng, Siejiong, Pommura-Nongkynrih, Mawlai Datbaki, Urur Rangshken, bad Mawprem kiba la shim bynta ha ka lympung ba lai sngi naduh ka 21 haduh 25 tarik Risaw 2023 ha madan Rangshken.
Ha ka Basketball la don saw kynhun ki shynrang bad kynthei na ki shnat Mawlai-Laitumkhrah, Wahlang, Mawprem bad Upper Shillong.
Ki nongjop lahduh ha kine ki jingïalehkai ki long ka Manai pyrshah ïa ka Urur Rangshken ha ka Football bad ha ka Basketball ka nam lahduh ka leit sha ka Mawlai pyrshah ïa ka Mawprem na ka liang shynrang bad na ka liang kynthei la jop hi ka Mawlai pyrshah ïa ka shnat Wahlang jong ka Seng Kur Warjri.
Nalor ki kynhun nongjop kiba la ïoh ka nam lahduh, la pynkup nam ruh ïa ki samla ba kynsai ha ka jing-tbit ba shimet kum u samla Freddy Fender Warjri na Manai uba la ïoh ka nam Best Goalkeeper, Top Scorer la ïoh da u samla Balajied Warjri na Manai bad Shimbor Warjri na Urur Rangshken kiba la thep mar 4 tylli ki kol. U samla Balajied Warjri na Manai u la ïoh ka nam kum u riewkilan ba kynsai tam ne Best Player, katba u khynnah samla Micky Berth Warjri na Upper Shillong u la ïoh ïa ka nam kum u riewtbit ba dang rasong ne Promising Player ha ka phutbol.
