Mawkyrwat, Risaw 29
Ka Mawlangwir Sport Club ha ka 28 tarik u Risaw 2023 kaba dei ka sngi Saitjaiñ, ka la ïoh ban plie pyrda noh ïa ka lympung ïalehkai phutbol kaba heh duh ha ka distrik kaba la tip kum ka Mawlangwir Football Invitation Tournament 2023-24 ha madan Rowell Lyngdoh Stadium Saitsnad, Mawlangwir South West Khasi Hills District.
Ha katei ka sngi plie pyrda, ha ka jingïalehkai kaba nyngkong eh, ka Shillong Lajong Football Club ka la ïoh ban sdang da ka jingjop hadien ba ka la lah ban pynliem noh ïa ka North East United Football Club da 1-0 kol.
Haba phai sha ka jingïalehkai ha kane ka sngi, ka ka long shisha ka jinglehkai kaba itynnad bad ïakhaid bha. Ha ka kylla step mar sien sdang ka jinglehkai, ka North East United ka la pyni ïa ki sap ïalehkai ba itynnad hynrei da ka jingtbit ki rang-ïalehkai khmat, ka Shillong Lajong ka la ïoh ban pynkhih ïa ka jar lyngba u Wadajied Ryngkhlem uba phong ïa ka jersey no 11 ha ka minit kaba 12.
Ka North East United watla ka la shah thep, pynban kam shym la duh jingkyrmen bad ka la pyrshang ban ïakhun tyngeh, hynrei da ka jingtbit ki rangïalehkai shadien ka Shillong Lajong, ka North East kam shym la lah pynkhih jar watla ka la ïoh bun ki kabu bad tat haduh ban da kut ka kylla miet kam shym la lah ban pynphai ïa ka kol.
Ha kane ka sngi la wan ban sakhi ïa kane ka lympung da ki hajar ngut ki paidbah riewieit phutbol jong ka dong ka thaiñ bad la ïoh ban pynphuh-pynphieng shuh ïa kane ka lympung da ki jingrwai bad ki jingshad na ki samla donsap jong ka dong ka thaiñ.
Kum ban shu kdew, kane ka lympung ka dei kabe heh duh ba ka Mawlangwir Sports Club ka la ïoh ban pynlong ha kaba ka khusnam ka long T.15 lak tyngka baroh, kata T.10 lak ïa lahduh jong ka lympung bad T.5 lak ïa kaba wan ba ar.
Ha kane ka lympung ki don haduh 16 tylli ki kynhun kiba wan ban ïashimbynta, ka North East United FC, ka Shillong Lajong FC, Nongbri FC na Mawkyrwat, Benris FC na RiBhoi, MLP FT Shillong, Himal FC Dibrugarh, Smit FC Shillong, KMC FC Sonapur, Assam, Langsning FC Shillong, Khlieh Mawlieh FC Nongstoiñ, Golden Lion FC, Rymbai, Barak FC Nagaland, Tura United FC, Aphuyemi FC Nagaland, 7 Wasa FC Jowai bad ka Imphal FC na Manipur.
Ïa ka nam ‘Player of the Match’ ha kane ka sngi la ïoh da u Wadajied Ryngkhkem jong ka Shillong Lajong FC.
Ïa kane ka lympung ha katei ka sngi la plie pyrda da u Bah Ardent M Basaïawmoit, MLA ka Nong-krem Constituency, ryngkat ka jingdonlang u Bah Brightstar Marba-niang MLA ka Mawlai, ki nongpynïaid ka Mawlangwir SC naduh u Bah SK Budnad President MSC, Bah Koland Lyngdoh, Secretary Tournement Committee MSC, Bah NS Wanniang, Myntri Shnong bad kiwei kiwei ki riew rangbah.
Na ka liang ka Mawlangwir SC ka la pyntip ruh ba jingïalehkai ka ban wan kan long hapdeng ka Nongbri Football Club na Mawkyrwat pyrshah ïa ka Benris Football Club na Ribhoi ha ka 14 tarik u Naiwieng 2023.
