New Delhi, Naiwieng:
Kawei ka bor pahara jong ka Israel kaba dang 20 snem ka rta, ka la khlad noh ha ka Sngi Nyngkong hadien ka jingshah dung tari hapoh Jerusalem. Kane ka la jia hapdeng ka jingïakhun thma jong ka Israel bad ki lehnoh Hamas kaba la neh mynta la shi bnai tam.
Katei ka pulit ka la shah dung ha uwei u khynnah Palestine uba dang don16 snem ka rta, uba long u nongshong shnong jong ka East Jerusalem, uba la shah siat iap noh hadien jong katei ka jingjia. Ha katei ka jingjia, uwei u heh pulit jong ka Israel ruh u la mynsaw lang.
Ia katei ka pulit la ithuh kum ka Sgt. Elisheva Rose Ida Lubin bad la ong ba katei ka pulit ha katei ka sngi ka dang leit iaid pahara sha ka thaiñ Old City jong ka Jerusalem, ha kaba ka la iakynduh bad shah ktah kti ha utei u khynnah hadien ba ka poi ha katei ka jaka. La ong ba ka Lubin ka la mynsaw jur bha ha katei ka jingshah dung tari ha katei ka jingjia bad tang hadien khyndiat kynta ba la pynkit ia ka sha jaka sumar, ka la khlad noh namar ka jingjur palat jong ki jingshitom.
Katei ka pulit ka dei na Dunwoody, kaba don sha ka phang North jong ka Atalanta, bad ka la leit poi buhai shnong noh sha Israel hadien ba ka la mih noh na United States ha u snem 2021. Ha u snem 2022, ka Lubin ka la leit pyniasoh noh ialade sha ka kam pulit jong ka tnat Border, kaba dei ruh ha ka laiñ bat suloi. Naduh katei ka por hi la ong ba ka Lubin ka la poi sah noh ha Israel ha ryngkat ka iing ka sem jongka.
Kumjuh ruh la ong ba ki shipai ka Israel ha kine ki sngi, ki la leit ban pyndep ia ka kamram ba la phah da ka tnat iada jong ka Israel bad kata ka long ban leit pynjulor lut ia ki jingtei bad ki jaka treikam jong ki lehnoh Hamas bad ha kajuh ka por ruh ban pyndep ia ka thong jong ka Israel ban pynduh jait noh syndon ia katei ka kynhun lehnoh Hamas.
Ki shipai ka Israel, la ong ba ki la ioh ban siat pynjulor noh ruh ia ki jaka buh tyndong lyer ‘Gas Cylinder’ bad ki jaka buh tiar pynbthei jong ka Hamas hapoh Gaza.
Kumba 340 ngut ruh ki shipai ka Israel ki la shu khlad ei namar ka jingther bom dusmon jong ki lehnoh Hamas ha ka 7 tarik u Risaw, ha kaba palat 1,400 ngut ki nong Israel ki la duh ei noh ia ka jingim, kynthup lang ia kitei ki bor pahara bad ki shipai jong ka Israel nalor jong ki paidbah kiba khlad ha katei ka jingleit thombor jong ki lehnoh Hamas ha u bnai ba la lah.
Kumjuh ruh la ong ba ka jingther bom bad jingphah leit hiar thma jong ka Israel ia ki shipai jongka sha Gaza, ka la shim ia ka jingim jong palat 10,000 tam ki paid nongshong shnong ka Gaza katba ka thma ka dang iai bteng tad haduh kine ki sngi.
