Montreal, Naiwieng:
Katkum ki khubor, la ong ba ha ka miet Sngi Palei, ka la mih ka jingsynreit kuli ha ki 2 tylli ki skul Jiw hapoh Montreal, hynrei ym shym la don kiba mynsaw. Kane ka long hadien ka jingkulmar kaba la mih hapoh Canada namar jong ka thma hapdeng ka Israel bad ka Hamas.
La iathuh ba ha ka step Sngi Thohdieng la iohi ia ki kuli kiba la ksam bad sahkut ha ki kynroh jong kitei ki skul bad kiba la shah synreit kuli baroh shi miet.
Dang shen ha kane hi ka taiew la ong ba ka la mih ka jingïakynad hapdeng ki khynnah pule jong ka Concordia University kiba dei na Palestine bad na Israel, ha kaba kitei ki arliang jaitbynriew ki la ia aireng markylliang namar ka jingleit hiar thma jong ka Israel ia ka Gaza.
U nongialam ka Canada- u Justin Trudeau ha katei ka sngi u la ong ba ka jingkhie jong ka thma Israel bad ki lehnoh Hamas ka la pynkhih win ia ka pyrthei baroh kawei bad kumta ka long ruh ka jingma kaba khraw ia baroh ki ri lada ym lah ban pynsangeh noh ia katei ka thma ha ka por kaba biang.
Hynrei u la ong ba ka Canada ka long ka ri kaba shongsuk- shongsaiñ bad kam ju don ia kum kine ki jingïakynad jaitbynriew. pynban namar ka thma Israel, ka la wanrah ia kum katei ka jingjia ha katei ka miet bad ka bym don jingshngaiñ shuh ia ka ri Canada.
