Tel Aviv, Naiwieng:
U Myntri Rangbahduh ka Israel- u Benjamin Netanyahu, ha ka Sngi Ba-ar u la ong ba ka Israel kan khang noh ia ka umphniang kali sha Gaza bad nangta kan ym sangeh ia ka thma da lei-lei ruh katba ki lehnoh Hamas kim pat pyllait ia baroh kito kiba la dep shah rahbor naduh kaba sdang jong ka jingleit thombor ia ka Israel ha ka 7 tarik u Risaw.
Haba ai jingkren sha ki paidbah ha katei ka sngi, ha ka jingdap shi bnai jong ka thma hapdeng ka Israel bad ka Hamas, u Netanyahu u la maham pyrshah ruh ia ka kynhun lehnoh Hezbollah kaba la ioh jingkyrshan na ka Iran, ba kam dei ban shim ia ka rai kaba bakla bad kam bit ban pynpur ne pynheh ia ka thma Israel sha Lebanon.
Ka thma hapdeng ka Israel bad ka Hamas ka la sdang naduh ka 7 tarik jong u Risaw ba la leit, hadien ba ka Hamas ki la leit ban hiar thma ia ka Israel bad ki la ther dusmon ruh da ki spah tylli ki ‘namding, ha kaba palat 1,400 ngut ki nong Israel ki la khlad ha katei ka por kynthup ia ki shipai jong ka Israel bad kumjuh ruh ki ‘riew paidbah kiba dei na kiwei ki ri bad kiba shu leit sah shipor sha Israel. Nalor kata, la ong ba ki lehnoh Hamas ki la rahbor dusmon ruh palat 240 ngut ki briew na Israel bad ki la leit ruh wat ban pyniap haduh ha iing- ha iing ia ki paidbah nongshong shnong ka Israel bad ki la leit ban mait bad khrai khlieh naphang naduh ki baheh haduh ki khyllung ha katei ka jingleit hiar thma jongki sha ki shnong jong ka Israel.
Namar katei ka jingleh kput jong kitei ki lehnoh Hamas, ka Israel ruh ka la smai ba kan kput bad kan pynduh pyndam syndon ia katei ka kynhun lehnoh watla ka don hapoh u pud-u sam jong ka ri Palestine. Nalor nangta la ong ba ka jingther bom bad jingphah leit hiar thma jong ka Israel ia ki shipai jong ka sha Gaza, ka la shim ia ka jingim jong palat 10,000 tam ki nong Palestine kiba don hapoh Gaza Strip. Kane pat ka la wanrah ia ka jingsngewkhia bad ka jingpyrshah na kiba bun ki ri bad ki tnat bapher bapher namar ka jingkhlad bad jingduh ei ia ki mynsiem ba lui-lui ki bym don dak sniew eiei hynrei kiba long tang ki nongshong shnong jong ka Gaza, kaba la synshar da katei ka kynhun lehnoh Hamas.
Ha kajuh ka por ruh la ong ba ka Iran bad kiwei de ki ri Muslim, ki la dawa ia ka Israel ba ka dei ban sangeh noh mardor ia katei ka jingleit hiar thma sha Gaza bad lym kumta, ki la byrngem bad kin pynheh bad pynpur ia katei ka thma wat sha kiwei pat ki ri ba marjan jong ka Israel.
Katba, na ka liang jong ka United States, ka la pynpaw ba kam sngew dei ban pynsangeh noh ia katei ka thma Israel, namar lada leh kumta, kan long pynban ka jing ailad ia ki lehnoh Hamas bad ki lah ban khyllie khlieh bad ban pynhiar kput biang hadien- habud bad kane ka long ka jingma kaba khraw ia kiwei kiwei ruh ki ri ym tang ia ka Israel.
Hynrei la ong ba ka United States ka la kyntu ia ka Israel ban shu sangeh noh shwa shipor kumba 3 sngi eiei ia ka jingleit hiar thma sha Gaza, khnang ba yn lah ban pynpoi ia ki lad jingiarap sha ki paid nongshong shnong ka Gaza.
