Rome, Nohprah:
Ka jingiatyngkhuh jong ar tylli ki rel ha ka thaiñ Northern Italy ha ka miet Sngi U Blei, ka la wanrah ia ka jingmynsaw jong 17 ngut ki briew bad ym shym la don kiba mynsaw jur namar kitei ki rel kim pat dei kiba iaid stet haduh katta katta.
Ka jingiatyngkhuh jong kitei ki rel ka long ha ki bynta jong ka Bologna bad ka Rimini, kaba kham hap bha ha ki bynta ba hapdeng jong ka nongbah Faenza bad Forli.
Ka tnat pynlip ding jong katei ka nongbah ha katei ka miet ka la pyntip ba 17 ngut ki la mynsaw na katei ka jingjia ha ka miet Sngi U Blei. Katba na ka liang ki bor pyniaid rel ki la pyntip ba ym shym la don kiba mynsaw jur ha katei ka jingjia hynrei dei tang ki jingmynsaw ba malu-mala.
Katkum ki dur ba la pynsaphriang da ka kynhun pynlip ding, la iohi ia ka bynta ba sha khmat jong kawei na kitei ki 2 tylli ki rel kaba la julor ha ka jing iatyngkhuh mar khmat bad katei kawei pat ka rel.
U Myntri ka tnat Transport jong ka Italy, u Matteo Salvini, uba long ruh ha kajuh ka por u Symbud Myntri Rangbahduh jong kane ka ri, u la ong ba ka tnat Transport ka dang wad bniah bad bud dien haba iadei bad kane ka jingjia kaba la jia ha ka miet ba la lah. Hynrei u la pyntikna pat ba kitei kiba mynsaw baroh kim shym la shah ktah jur ne mynsaw jur hynrei ki shu don tang katto katne ki jingshitom ki bym da ktah.
Kane ka jingjia ka long ruh tang hadien 3 bnai ba 5 ngut ki nongtrei ka tnat rel ki la shah rat ha kawei ka rel katba ki dang pynbit pynbiang ia ka jinglong jingman ha Milan-Turin ha ka 31 tarik u Nailar jong une u snem 2023.
Hynrei ka jingjia tyngkhuh rel ba kham shyrkhei tam hapoh Italy ka long ha u snem 202, hadien ba 2 ngut ki nongtrei jong ka tnat ‘Railway’ hi ki la khlkad bad 31 ngut pat kiba shong ha katei ka rel ki la mynsaw na ka jingkylla jong katei ka rel hajan Lodi, sha ka phang South jong ka Milan.
Kumjuh ha u Kyllalyngkot jong u snem 2018 pat, 3 ngut ki kynthei ki la duh ei ia ka jingim bad kumba 100 ngut kiba la mynsaw hadien ba katei ka rel kaba la dap briew ka la kylla hajan Milan. Ka daw jong kitei ki jingkylla ka rel la ong ba ka long namar ka jingsniew jong ki lynti iaid rel.
