Washington, Nohprah:
U President ka Ukraine- u Volodymyr Zelensky ha ka Sngi Ba-ar la ong ba un sa leit sha ka nongbah Washington jong ka United States ban leit iakynduh ia u President ka US- u Joe Biden bad ban kyntu ia ka United States ba kan iarap kyntu ia kiwei pat ki tnat bad ki ri bapher bapher ba kin phah ia ki lad jingiarap bad ka pisa noh synñiang sha ka Ukraine hapdeng ka jingiakhun jong ka bad ka Russia. Kane ka jingleit jong u Zelensky sha US ka long hadien ba la ioh ia ka jingmaham ba ki Lad jing-iarap ba ju phah ki lah ban kut noh ha kane hi ka taiew.
Ha katei ka sngi, la ong ba u Biden bad u Zelensky kin ioh ban iakren halor bun tylli ki mat ba iadei bad ki jingdonkam ba kyrkieh jong ka Ukraine ha kane ka por katba ka dang iakhun pyrshah ia ka Russia ha ka jingiakhun thma kaba la neh mynta la jan don 2 snem.
Kumjuh ruh la ong ba ka Ukraine ka la pynbna ba katei ka jingiakynduh hapdeng jong kitei ki nongialam, ka long ban pynskhem ruh ia ka jingiatrei lang haba iadei bad ka jingthaw bad pynmih ia ki tiar iakhun thma na ryngkew bad kumjuh ruh nalor suiñ bad ha kajuh ka por ruh ban pyntikna ia ka jingiatrei lang bad kiwei ruh ki ri ha kine ki snem ki ban wan.
Kumba la iohi ha kine ki khyndiat por ba la leit ba utei u President ka United States u la kyntu ia ki tnat bapher bapher ba kim dei ban pynsangeh ia ki lad jingiarap sha ka Ukraine katba ka thma ka dang iai bteng namar u la ong ba kam long ban ailad ia ka Russia ba kan jop ha katei ka thma. Lada ka Russia kan jop ia ka Ukraine, ka lah ruh ban leit hiar thma sa ia ki ri jong ka NATO. Namar kata, baroh ki ri bad ki tnat jong ka pyrthei ki dei ban tehlakam ia katei ka jingma katba ka por ka dang biang.
