Islamabad, Rymphang:
Katkum ki khubor, la ong ba utei u Myntri Rangbahduh barim jong ka Pakistan ha ryngkat bad ka kurim jong u ha ka Sngi Balang ki la shah pynngat ha ki kyndon pynkheiñ aiñ jong ka jingbamsap bad la rai ruh ban set patok haduh 14 snem kynthih namar katei ka jingdon kti jong ki ha ki kam bamsap bapher bapher ha ki por ba u dang long kum u Myntri Rangbahduh jong ka Pakistan.
Kane ka khubor ka long hashwa ba ka Pakistan kan sa ioh ban pynlong noh ia ka ilekshon bad ka long ruh tang hadien shi sngi ba u Khan u la shah shah rai ban shong patok haduh 10 snem haba iadei bad kiwei pat ki kam ba sop-sop jong u mynba u dang long u nongialam jong ka Pakistan ha ki snem ba la leit.
Kumta la ong ba katei ka khubor ka long kaei kaei kaba sngewsih bad kaba pynbud nam ia ka seng Tehreek-e-Insaf (PTI) hapdeng ka jingpynkhreh jongka ban iakhun ha katei ka ilekshon ka ban long.
Ia mynta hi ym pat lah ban tip shai la kitei ki kyndon kyn treikam noh syndon ne em haba iadei bad utei u nongialam namar la ong ba u la shu shah bat kput ha kiba bun tylli ki kyndon naduh ba la kem ia u ha u bnai Nailar jong u snem 2023 ba la leit.
Hynrei la iathuh pat ba wat ka kurim jong u Khan ruh ka la shah pynngat kyndon lang ha kitei ki kam bamsap ba shimet jong u ha ki por ba u dang long u nongialam jong ka ri.
Ia mynta hi, ki pulit bad ka aiñ kim pat shym la leit kem ne rah noh ia ka kurim jong u Imran Khan- ka Bushra Bibi hynrei ki dang pynbna shuwa ia kitei ki kyndon kiba la pynngat da ka ïingbishar pyrshah ia ka kurim jong utei u nongialam bad kumta ruh ka Bibi kan hap ban pynkhreh ia ka jingshah set bindi kaba 14 snem kynthih kumba la dep pynbna bad kumba la kdew haneng.
Kitei ki shijur ki la iathoh shongkurim ha u snem 2018, tang khyndiat bnai shuwa ba u Khan un shah jied ban long u Myntri Rangbahduh jong ka ri Pakistan ha utei u snem.
Ka Bibi, la ong ba ka long ka nongialam niam bad kaba la iakynduh bad u Khan ha ka por ba u leit mih sha ka ban pan jingiarap haba iadei bad ka jingngeit bad jingshem mynsiem jong u. Hynrei ia ka Bibi ym ju kham iohi pyrthei than naduh katei ka por ba ka la shongkurim ia u Khan.
