Washington, Rymphang:
Ka Department of Justice jong ka United States, ha ka Sngi Ba-ar ka la pynngat ia uwei u briew uba don kti ha ki kam thok pisa da kaba rai set patok haduh 9 snem haba iadei bad katei ka jingleh kam be-aiñ kaba u la ioh nong haduh USD 2.8 Million.
Ia utei u briew la ithuh kum u Yogesh K.Pancholi bad uba la don 43 snem ka rta. U Yogesh u long u nongshong shnong jong ka Michigan, bad u ju pyntreikam ia kawei ka jaka sumar Shring Home Care Inc. (Shirng) kaba long ka kam shimet jong u. La ong ba utei u briew u la pyndonkam ia ka jingsoi bad ki kot- ki sla ba donkam jong kiwei pat ki kompeni dawai ban ioh pyntreikam ia katei ka jaka sumar be-aiñ jong u kaba khlem pynrung kyrteng ha ki tnat sumar lane ioh jingithuh da ka sorkar.
Kumta, la ong ba tang hapoh ar bnai ba la sdang pyntreikam ia katei ka jaka sumar kaba la shu plie be-aiñ, u Yogesh bad kiba iaseng kam lang bad u, ki la ioh nong haduh kumba USD 2.8 Million na kiba leit ban iadei kam bad katei ka jaka sumar lane ka dukan dawai.
Hadien kata, u Yogesh u la phah ia katei ka pisa baroh sha ki Account jong kito kiba ïadon bynta lang ha katei ka kam ba u seng bad kumjuh ruh sha ka Account jong u kaba hapoh India.
Hynrei, haba la lap ia kane bad haba la tohkit da ki tnat tohkit, u Yogesh u la phla ba u la pyndonkam da ki jingtip ba shu thok bad ki kot-ki sla kiba u shu ioh na kiwei pat ki tnat ne ki kompeni tang ba un ioh kamai be-aiñ khlem ka jingithuh jong ka sorkar bad u ju phah ruh da ki kot ki sla kiba shu thok sha ka Sorkar khnang ba kan ym lap ia katei ka jingleh thok jong u.
Namar kata, ka Department of Justice ha kane ka kynti ka la rai ban set patok shuwa ia utei u nong India haduh kumba 9 snem kynthih bad hadien kata yn khang noh ia u ban leit rung ne ban shong- ban sah hapoh ka ri United States namar kitei ki kam pynkheiñ aiñ jong u kiba long palat ia ka aiñ ba la buh da ka ri.
