Iraq, Iaïong:
Kumba 6 ngut ki khynnah pule ki la khlad bad 14 ngut pat ki la mynsaw na ka jingleit rat bakla jong kawei ka trok katba ki dang iaid lynti ha ka thaiñ Basra jong ka Iraq ha ka Sngi Ba-ar.
U heh ka tnat kam pohiing ka Iraq, u Miqdad Miri, u la iathuh ba ki pulit ka Basra ki la ioh bat noh ia u nongñiah jong ka trok kaba leit ban rat ia kitei ki khynnah kiba dang iaid lynti ha katei ka jaka hajan ka skul jongki, ha kaba 6 ngut ki la khlad noh bad kumba 14 ngut pat kiba ngat bad mynsaw ha katei ka jingjia.
Katkum ka jing- iathuh jong ki bor pyniaid kiba la ioh bat ia utei u nongñiah ha katei ka sngi, la ong ba u nongñiah um lah shuh ban tehlakam ia katei ka trok hadien ba ka ‘brake’ jong katei ka trok kam shym la treikam satia wat la u la pyrshang ban pynsuki bad ban pynsangeh ia ka trok.
Ha u snem 2022, ki la don palat 4,900 ngut ki briew hapoh Iraq kiba ngat bad khlad ha kum kitei ki jingjia shah rat ne shah tynrah kali; kaba mut kumba 13 ngut ki briew ki ju khlad ha kum kitei ki jingjia man la ka sngi.
Namar la ong ba ka jingjur palat ka bamsap, ka jinghiar ha ka ioh- ka kot jong katei ka ri, ka la pynlong ia katei ka ri ba kan nym lah shuh ban pynbit pynbiang ia ki lynti- syngkien bad ki surok lane ki jingkieng kiba kongsan na ka bynta ka leit ka wan bad ka jingshngaiñ jong ki paidbah nongshong shnong.
Hynrei ki heh bad ki bor pyniaid jong katei ka ri pat ki ju kynnoh bad pharep beit-beit tang ia ki nongñiah kali ha man ba don kitei ki jingjia, da kaba kynnoh ruh ba ka rukom ñiah jong ki nongñiah kali ka la iaid lait ia ka aiñ jong ka jingpynher kali. Lane don pat ba ki bor pyniaid ki shu kynnoh ba ki nongñiah kali ki pyndonkam artad ia ka phone por ba ñiah kali, lane ba ki la buaid kyiad ne buaid drok bad kumta ter-ter.
Katba ka daw bah halor ka jingjur jong kum kine ki jingjia ha katei ka ri, ka long namar ba ki bor pyniaid kim lah ban pynbiang ne pynbha ia ki surok bad ki lynti iaid ba ki kali ki dei ban iaid lynti man ka sngi.
