Tokyo, ïaïong:
Ki heh ka Taiwan ha ka Sngi Balang ki la pyntip ba 60 ngut ki la mynsaw bad iwei pat ba khlad na u jumai bah uba la pynkhynñiuh ia katei ka ri dew lynnong ha katei ka step bad kaba la wanrah ruh ia ki ‘erlangthari bad ki jing-at phyllung kiba jur wat shaduh Japan bad Phillipines shwa ba utei u jumai un sangeh ha katei ka sngi.
La ong ba utei u jumai ba ka Taiwan ka sakhi ha katei ka sngi, u long uba khlaiñ bor tam eh ba katei ka ri dew lynnong kam pat ju ioh mad ha kine 25 snem ba la leit.
Namar kata ruh, ki bor pyniaid katei ka ri ki la maham lypa ba ka ri ka dang lah ban ioh mad sa ia kiwei pat ki jing khynñiuh jumai kiba kham jur ha kine ki sngi wan wan lada ka jinglong-jingman ha katei ka duriaw kam pat i-don jing shngaiñ.
Ki bor pyniaid ka Taiwan ki la iathuh ba utei u jumai u long uba jur tam ba katei ka ri kan ioh mad hadien u jumai bah uba 7.6 Magnitude uba la pynkhynñiuh ia katei ka ri ha u Nailur jong u snem 1999, ha kaba palat 2,400 tam ki briew ki la duh ei ia ka jingim ha utei u snem.
Hynrei, utei u jumai uba la khynñiuh ha katei ka sngi pat u dei uba la kot ia ka jingkhlaiñ kaba 7.4 Magnitude bad kane ka la jia ha ka por kumba 8 baje mynstep.
